தமிழக முதல்வர் மு.க. ஸ்டாலின் அவர்களை சந்தித்த பின் செய்தியாளர்களுக்கு பேட்டி அளித்த நடிகர் எஸ்.வி. சேகர், "எல்லோரும் விரும்பும் திராவிடனாக இருக்க விரும்புகிறேன்" என்றும், "இனி மேல் நான் பாஜகவில் இல்லை" என்றும் தெரிவித்தார். அவர் மேலும் கூறியதாவது:
"என்னுடைய ஓட்டு தான் பாஜகவுக்கு தேவை, பாஜகவின் ஓட்டு எனக்கு தேவையில்லை," என்று கூறிய எஸ்.வி. சேகர், "நான் ஐந்து வருடம் எம்.எல்.ஏ.வாக இருந்து உள்ளேன். அந்த ஐந்து வருடத்தில் ஒரு ரூபாய் கூட கமிஷன் வாங்காத எம்.எல்.ஏ. என்பதை நான் உறுதி செய்துள்ளேன்," என்று தெரிவித்தார்.
அவர் மேலும், "அண்ணாமலை இன்னும் ஒரு கவுன்சிலர் கூட ஆகாத அரசியல்வாதி. அண்ணாமலை போன்ற கீழ்த்தரமான அரசியல்வாதிகள் இருக்கும் அரசியலில் நான் இருக்க விரும்பவில்லை. எனவேதான் நான் என்னுடைய பாஜக மெம்பர்ஷிப்பை சிறப்பை புதுப்பிக்கவில்லை.
மோடி அழைத்தார் என்பதற்காக தான் நான் பாஜகவில் இணைந்தேன். என்னை கட்சியிலிருந்து நீக்க வேண்டும் என்று அண்ணாமலை தலைகீழாக தண்ணி குடித்து பார்த்தார், ஆனால் அவரால் முடியவில்லை. தற்போது நானே அந்த கட்சியில் இருந்து விலகி உள்ளேன். இனி நான் அரசியலில் ஈடுபட போவதில்லை. எல்லோருக்கும் நண்பனாக, ஒரு இந்தியனாக, ஒரு தமிழனாக, ஒரு திராவிடனாகவே இருக்க விரும்புகிறேன்," என்று கூறினார்.