சூப்பர் ஸ்டார் ரஜினிகாந்த் நடித்த ‘ஜெயிலர் 2’ படத்தின் படப்பிடிப்பு விரைவில் தொடங்கும் என்ற தகவல் ஏற்கனவே வெளியாகியிருந்த நிலையில், இதுகுறித்த முக்கியமான அறிவிப்பை சன் பிக்சர்ஸ் தனது சமூக வலைதளங்களில் பகிர்ந்துள்ளது.
ரஜினிகாந்த் நடிப்பில், நெல்சன் இயக்கத்தில், அனிருத் இசையமைப்பில், சன் பிக்சர்ஸ் தயாரித்த ‘ஜெயிலர்’ திரைப்படம் 2023ஆம் ஆண்டு வெளியானது. இப்படம் ரசிகர்களிடம் பெரும் வரவேற்பைப் பெற்றது.
இதன் தொடர்ச்சியாக, ‘ஜெயிலர்’ படத்தின் இரண்டாம் பாகம் உருவாகும் என்று அதிகாரப்பூர்வ அறிவிப்பு வெளியாகி, அதன் முதல் டீசர் இணையத்தில் வைரலானது. மேலும், இப்படத்தின் படப்பிடிப்பு மார்ச் மாதத்தின் இரண்டாவது வாரத்தில் தொடங்கும் என தகவல்கள் வெளிவந்தன.
இந்நிலையில், சன் பிக்சர்ஸ் நிறுவனம் தன்னுடைய சமூக வலைதள பக்கத்தில், "முத்துவேல் பாண்டியன் வேட்டை ஆரம்பம்! ‘ஜெயிலர் 2’ படத்தின் படப்பிடிப்பு இன்று முதல் தொடக்கம்" என அறிவித்துள்ளது. இதன்மூலம், ‘ஜெயிலர் 2’ படப்பிடிப்பு இன்று அதிகாரப்பூர்வமாக ஆரம்பிக்கப்பட்டுள்ளது.
இந்த படத்தின் முதல்கட்ட படப்பிடிப்பு சென்னையில் நடைபெறுகிறது என்றும், அதனை தொடர்ந்து தேனி, கோவா மற்றும் சில பகுதிகளில் படப்பிடிப்பை நடத்த படக்குழு திட்டமிட்டுள்ளது. மேலும் ரஜினியுடன் முதல் பாகத்தில் நடித்த சிவராஜ்குமார் மற்றும் மோகன்லால் இருவரும் இரண்டாம் பாகத்திலும் நடிப்பது உறுதி செய்யப்பட்டுள்ளதாக தகவல் வெளியாகியுள்ளது.