இந்தியாவுக்கு கைமாறு செய்யும் வகையில் இந்தியா - தென் ஆப்பரிக்கா அணிகள் இடையே நடைபெறும் தொடருக்கு தென் ஆப்பரிக்கா கிரிக்கெட் வாரியம் புதிய பெயர் வைத்துள்ளது.
இலங்கை அணியுடன் நடைபெற்று வரும் இரண்டாவது டி20 போட்டி தொடர் முடிந்த பின் இந்திய அணி தென் ஆப்பரிக்கா சுற்றுப்பயணம் செல்கிறது. அங்கு தென் ஆப்பரிக்க அணியுடன் 3 டெஸ்ட், 6 ஒருநாள் மற்றும் 3 டி20 போட்டிகள் கொண்ட தொடரில் விளையாடுகிறது.
2018ஆம் ஆண்டு ஜனவரி மாதம் 5ஆம் தேதி முதல் டெஸ்ட் போட்டி தொடங்குகிறது. டெஸ்ட் தொடருக்கான இந்திய அணி அறிவிக்கப்பட்டுள்ளது. இந்நிலையில் இந்தியா - தென் ஆப்பரிக்கா அணிகள் விளையாடும் தொடருக்கு தென் ஆப்பரிக்க கிரிக்கெட் வாரியம் புதிய பெயர் ஒன்றை வைத்துள்ளது.
‘தி ஃபிரீடம் சீரிஸ்’ என்று பெயரிடப்பட்டுள்ளது. 1991ஆம் ஆண்டு கிரிக்கெட் உலகில் காலடி எடுத்து வைக்க உதவிய இந்தியாவுக்கு கைமாறு செய்யும் வகையில் இந்த தொடருக்கு பெயரிடப்பட்டுள்ளது. இதுதொடர்பாக தென் ஆப்பரிக்க கிரிக்கெட் வாரியம் வெளியிட்டுள்ள செய்திக்குறிப்பில் குறிப்பிடப்பட்டுள்ளதாவது:-
இந்த தொடருக்கு முதலில் ஃப்ரண்ட்ஷிப் சீரிஸ் என்றுதான் பெயரிட இருந்தோம். நிறவெறிக்கு எதிரான நாடுகளில் இந்தியா முக்கியமானது. அகிம்சை வழியில் சுந்தந்திரம் பெற்ற இந்தியா மற்றும் தென் ஆப்பரிக்கா ஆகிய இருநாடுகளின் வரலாற்று பாரம்பரியத்தை அங்கீகரிக்கும் வகையில் சிறந்த பெயராக ‘தி ஃபிரீடம் சீரிஸ்’ இருக்கும் என்று தெரிவிக்கப்பட்டுள்ளது.