சங்கி என்பது கெட்டவார்த்தை என ஐஸ்வர்யா எங்கேயும் சொல்லவில்லை- ரஜினி

தமிழ் சினிமாவின் சூப்பர் ஸ்டார் ரஜினிகாந்த். இவர்  தற்போது,  லைகா நிறுவனத்துக்கு லால் சலாம்  படத்தில் நடித்திருக்கிறார்.

இப்படத்தில் விஷ்ணு விஷால், விக்ராந்த் உள்ளிட்ட இளம் நடிகர்களுடன் இணைந்து லால் சலாம் படத்தில் மொய்தீன் பாய் என்ற இஸ்லாமியர் வேடத்தில் ரஜினிகாந்த் நடித்துள்ளார்.

இந்த படத்தின் ஷூட்டிங் சமீபத்தில் நிறைவடைந்து இப்போது ரிலீஸ் பணிகள் நடந்து வரும் நிலையில்   இந்த படம் 2024 ஆம் ஆண்டு பொங்கலை முன்னிட்டு ரிலீஸ் ஆகவுள்ளதாக அறிவிக்கப்பட்டு,  பின்னர் பிப்ரவரி 9 ஆம் தேதிக்கு ரிலீஸ் தள்ளி வைக்கப்பட்டது.

இந்நிலையில் சமீபத்தில் இந்த படத்தின் ஆடியோ வெளியீட்டு நிகழ்ச்சி சென்னையில் நடந்தது.

அப்போது பேசிய லால் சலாம் படத்தின் இயக்குனரும், ரஜினியின் மூத்த மகளுமான ஐஸ்வர்யா ரஜினி “என் அப்பாவை சங்கி என விமர்சிக்கிறார்கள்.  அதைக் கேட்கும் போது எனக்கு வருத்தமாக இருக்கிறது. அவர் ஒரு சங்கியாக இருந்திருந்தால் லால் சலாம் படத்தில் நடித்திருக்க மாட்டார். ஒரு சங்கியால் இந்த படம் பண்ண முடியாது. இந்த படத்தில் அவரை தவிர தைரியமாக யாருமே நடித்திருக்க முடியாது. நீங்கள் எந்த மதத்தைச் சேர்ந்தவராக இருந்தாலும், இந்த படம் உங்களைப் பெருமைப்படுத்தும். ரஜினிகாந்த் கண்டிப்பாக சங்கி இல்லை” எனக் கூறியிருந்தார்.

இந்த நிலையில், இன்று  சென்னை விமான நிலையத்திற்கு வந்த சூப்பர் ஸ்டார் ரஜினிகாந்த் செய்தியாளர்களுக்கு பேட்டியளித்தார்.

அதில், சங்கி என்பது கெட்டவார்த்தை  என்று பொருள்பட  ஐஸ்வர்யா பேசவில்லை; ஆன்மீகவாதியான தனது தந்தையை சங்கி என குறிப்பிடக் கூடாது என ஐஸ்வர்யா பேசினார் என்று விளக்கமளித்தார்.