விஜய் அரசியலில் இறங்கப் போவதால் தற்போது நடித்து வரும் கோட் படத்துக்குப் பிறகு இன்னும் ஒரு படத்தில் மட்டுமே நடிப்பேன் என அறிவித்துள்ளார். இதனால் தற்போது அவர் நடித்து வரும் GOAT திரைப்படத்தின் மீது மிகப்பெரிய அளவில் எதிர்பார்ப்பு எழுந்துள்ளது. இந்த படத்தில் அவரோடு பிரசாந்த்,பிரபுதேவா, மீனாட்சி சௌத்ரி, ஜெயராம் மற்றும் மோகன் ஆகியோர் நடிக்கின்றனர். யுவன் ஷங்கர் ராஜா இசையமைக்க, சித்தார்த்தா நுனி ஒளிப்பதிவு செய்து வருகிறார். படத்தை ஏஜிஎஸ் நிறுவனம் தயாரித்து வருகிறது.
இந்த படத்தின் இறுதிகட்ட படப்பிடிப்பு தற்போது இலங்கையில் நடந்து வரும் நிலையில் செப்டம்பர் 5 ஆம் தேதி இந்த படத்தின் ரிலீஸ் என அறிவிக்கப்பட்டுள்ளது. இந்நிலையில் இந்த படத்தின் விஎஃப்எக்ஸ் பணிகளும் விறுவிறுப்பாக நடந்து வருகிறது.
ஏற்கனவே இந்த படத்தின் முதல் சிங்கிள் பாடல் வெளியாகி கலவையான விமர்சனங்களைப் பெற்ற நிலையில் இரண்டாவது சிங்கிள் பாடல் ஜூன் 22 ஆம் தேதி விஜய்யின் 50 ஆவது பிறந்தநாளை முன்னிட்டு ரிலீஸ் ஆகும் என சொல்லப்படுகிறது. இதை சூசகமாக படத்தின் தயாரிப்பாளரான அர்ச்சனா கல்பாத்தியும் வெளிப்படுத்தியுள்ளார்.