திருப்பத்தூரில் காலையில் தேர்வுக்கு செல்ல காத்திருந்த மாணவி பேருந்து நிறுத்தப்படாததால் பின்னாலேயே ஓடிய சம்பவம் அதிர்ச்சியை ஏற்படுத்தியுள்ளது.
தற்போது தமிழக பாட திட்டத்தில் செயல்படும் பள்ளிகளில் அரசு பொதுத்தேர்வுகள் நடைபெற்று வருகின்றன. இந்நிலையில் திருப்பத்தூர் மாவட்டம் வாணியம்பாடியில் கோத்தக்கோட்டை என்ற பகுதியில் பள்ளி மாணவி ஒருவர் தேர்வுக்கு செல்வதற்காக பேருந்துக்கு காத்திருந்துள்ளார்.
ஆனால் அவ்வழியாக சென்ற பேருந்து, நிறுத்தத்தில் நிற்காமல் சென்றதால் அந்த மாணவி பேருந்தின் பின்பக்க கம்பியை பிடித்துக் கொண்டு, பேருந்தை நிறுத்துமாறு கத்திக் கொண்டே ஓடியுள்ளார். சில நூறு மீட்டர்கள் சென்ற அந்த பேருந்து பின்னர் நிறுத்தப்பட்டதும், மாணவி உள்ளே ஏறினார்.
இந்த வீடியோ சமூக வலைதளங்களில் பெரும் பரபரப்பை ஏற்படுத்தியது. இந்நிலையில் மாணவிக்கு பேருந்தை நிறுத்தாமல் ஓட்டிச்சென்ற ஓட்டுநர் முனிராஜை பணியிடை நீக்கம் செய்து போக்குவரத்துக்கழகம் உத்தரவிட்டுள்ளது.
Edit by Prasanth.K
