பொங்கல் பண்டிகை கொண்டாட தென் மாவட்ட மக்கள் சொந்த ஊருக்கு சென்று கொண்டிருக்கும் நிலையில், இன்று இரவு சென்னையில் இருந்து திருவனந்தபுரத்திற்கு தென் மாவட்டங்கள் வழியாக சிறப்பு ரயில் இயக்கப்படும் என ரயில்வே அறிவித்துள்ளது.
பொங்கல் பண்டிகை தொடர் விடுமுறையை முன்னிட்டு, சென்னையில் இருந்து ஏராளமானோர் தென் மாவட்டத்திற்கு தங்கள் சொந்த ஊர்களுக்கு பயணம் செய்து வருகின்றனர். கடந்த வெள்ளிக்கிழமை முதலே பயணம் செல்ல தொடங்கிவிட்ட நிலையில், இன்றும் நாளையும் அதிக அளவில் பயணம் செய்ய வாய்ப்பிருப்பதாக புறப்படுகிறது. குறிப்பாக, சென்னையில் இருந்து மதுரை, திருச்செந்தூர், கன்னியாகுமரி, நெல்லை போன்ற தென் மாவட்டங்களுக்கு செல்லும் ரயில்களில் அதிக அளவு கூட்டம் இருந்தது.
இந்த நிலையில், கூட்ட நெரிசலை தவிர்க்கும் வகையில், தெற்கு ரயில்வே ஏற்கனவே சில சிறப்பு ரயில்களை இயக்கிய நிலையில், இன்று இரவு சென்னை எழும்பூரில் இருந்து திருவனந்தபுரத்திற்கு சிறப்பு ரயில் இயக்கப்படுவதாக அறிவிக்கப்பட்டுள்ளது. இன்று இரவு 11:45 மணிக்கு புறப்படும் இந்த சிறப்பு ரயில், நாளை மதியம் 2 மணிக்கு திருவனந்தபுரம் சென்றடையும்.
இந்த ரயில் விழுப்புரம், திருச்சி, திண்டுக்கல், மதுரை, சாத்தூர், கோவில்பட்டி, திருநெல்வேலி, வள்ளியூர், நாகர்கோவில் வழியாக திருவனந்தபுரம் செல்கிறது என்பது குறிப்பிடத்தக்கது.