சமீபத்தில் அதிமுகவிலிருந்து ஓ பன்னீர் செல்வம் நீக்கப்பட்ட நிலையில் அவர் அதிமுகவின் கட்சி, கொடி, சின்னம் உள்ளிட்ட எதையும் பயன்படுத்தக்கூடாது என்று நீதிமன்ற தீர்ப்பும் வெளியாகி உள்ளது. இந்த நிலையில் ஓபிஎஸ் தனது அணிக்கு அதிமுக தொண்டர்கள் உரிமை மீட்பு குழு என்ற பெயரை வைத்துள்ளதாக கூறப்படுகிறது. இருப்பினும் இந்த பெயரிலும் அதிமுக இருப்பதால் எடப்பாடி பழனிச்சாமி அவர் மீது சட்ட நடவடிக்கை எடுப்பார் என்று எதிர்பார்க்கப்படுகிறது.
கடந்த 2022 ஆம் ஆண்டு அதிமுகவிலிருந்து ஓ பன்னீர்செல்வம் நீக்கப்பட்ட நிலையில் ஓபிஎஸ் பல சட்ட போராட்டம் நடத்தியும் அவருக்கு அதிமுகவில் எந்தவித உரிமையும் கிடையாது என்று நீதிமன்ற தீர்ப்பு வெளியாகியுள்ளது.
இதனை அடுத்து அதிமுகவின் தனி அணியாக அவர் செயல்பட்டு வந்த நிலையில் அதிமுக சின்னமான இரட்டை இலை சின்னத்தை வாங்குவேன் என்று சமீபத்தில் கூட பேட்டி அளித்திருந்தார்.
இந்த நிலையில் அவர் தற்போது தனது அணிக்கு அதிமுக தொண்டர்கள் உரிமை மீட்பு குழு என்று பெயர் வைத்துள்ளதாகவும் இந்த பெயரில் அவர் லெட்டர்ஹெட் வடிவமைத்து உள்ளதாகவும் கூறப்படுகிறது. அதுமட்டுமின்றி அதிமுக தொண்டர்கள் உரிமை மீட்பு குழுவின் சார்பில் சில நிர்வாகிகளையும் அவர் நியமனம் செய்து அறிக்கை வெளியிட்டுள்ளார்.
அதிமுகவின் கருப்பு வெள்ளை கலரில் இந்த லெட்டர்ஹெட் இடம் பெற்றுள்ளதை அடுத்து அதிமுக என்ற பெயரும் இந்த அணியில் இருப்பதை அடுத்து அதிமுக சட்டப்படி நடவடிக்கை எடுக்கும் என்று எதிர்பார்க்கப்படுகிறது.