மேகதாது அணை குறித்த விவகாரம் தமிழகம் மற்றும் கர்நாடக மாநிலங்களுக்கு இடையே கருத்து வேறுபாடுகளை வளர்த்து வரும் நிலையில் நடைபெறவுள்ள பாராளுமன்ற தேர்தலில் கர்நாடக மாநிலத்தில் உள்ள அனைத்து கட்சிகளும் தங்கள் தேர்தல் அறிக்கையில் மேகதாது அணை கட்ட வேண்டும் என்பதை குறிப்பிட வேண்டும் என முன்னாள் பிரதமர் தேவகவுடா கூறியிருப்பது பெரும் சர்ச்சைக்கு உள்ளாகி உள்ளது.
கர்நாடக மாநிலத்தில் காவிரியின் குறுக்கே மேகதாது அணை கட்டியே தீருவோம் என ஆளும் காங்கிரஸ் கட்சி மற்றும் எதிர்க்கட்சிகளும் வலியுறுத்தி வரும் நிலையில் திமுக தனது தேர்தல் அறிக்கையில் மேகதாது அணையை கட்ட விடமாட்டோம் என்று கூறியிருந்தது
இந்த நிலையில் முன்னாள் பிரதமர் தேவகவுடா நேற்று செய்தியாளர்களிடம் பேசிய போது மேகதாது அணை கட்டுவதற்கு எதிர்ப்பு தெரிவித்துள்ள திமுகவுக்கு கண்டனம் தெரிவித்ததோடு, கர்நாடக மாநிலத்தில் உள்ள அனைத்து கட்சிகளும் தங்களது தேர்தல் அறிக்கையில் மேகதாது அணையை கட்டுவோம் என வாக்குறுதி தர வேண்டும் என்றும் கூறினார்
மேலும் பெங்களூரு நகரில் பொதுமக்கள் குடிநீர் தேவைக்காக திண்டாடி வருகின்றனர் என்றும் இந்த நேரத்தில் மேகதாது அணை கட்ட வேண்டியது அவசியம் என்றும் அவர் குறிப்பிட்டுள்ளார்.