சமீபத்தில் வெளியான பாவக்கதைகள் ஆந்தாலஜி திரைப்பட வெற்றி குறித்து சாந்தனு பாக்யராஜ் நெகிழ்ச்சியாக பேசியுள்ளார்.
கடந்த டிசம்பர் 18 ஆம் தேதி நெட்பிளிக்ஸில் பாவக்கதைகள் என்ற ஆந்தாலஜி திரைப்படம் வெளியானது. அதில் இடம்பெற்ற நான்கு குறும்படங்களும் ஆணவக்கொலைகளை மையமாக வைத்து உருவாகின. அதில் சுதா கொங்கரா இயக்கத்தில் சாந்தனு, காளிதாஸ் உள்ளிட்டோர் நடித்திருந்த திரைப்படம் தங்கம்.
இந்த படம் மிகுந்த கவனத்தைப் பெற்றுள்ளது. இதில் நடித்துள்ள சாந்தனு பாக்யராஜ் இந்த வெற்றி குறித்து டிவிட்டரில் ஒரு வீடியோ வெளியிட்டுள்ளார். அதில் ‘ஒரு படத்தின் வெற்றி என்பது இப்படிதான் இருக்குமா? ஏனென்றால் இந்த உணர்ச்சி எனக்கு புதிதாக உள்ளது. இது கிட்டத்தட்ட 12 வருடப் பசி. தங்கம்' படம் சம்பந்தப்பட்ட அனைவருக்கும் நன்றி சொல்லக் கடமைப்பட்டுள்ளேன். சுதாவுக்கு நன்றி சொல்லவேண்டும். ஏனென்றால் அவர் நான், காளிதாஸ் மற்றும் பவானி ஆகிய இளம் கலைஞர்களுக்கு வாய்ப்பளித்துள்ளார். எங்களுக்கான நம்பிக்கையை அதிகப்படுத்தியுள்ளார்.’ எனத் தெரிவித்துள்ளார்.சக்கரக்கட்டி திரைப்படம் மூலமாக அறிமுகமான சாந்தனு இதுவரை 10க்கும் மேற்பட்ட படங்களில் நடித்துள்ளார்.