தமிழக முதல்வராக அதிமுக பொதுச்செயலாளர் ஜெயலலிதா இன்று ஆறாவது முறையாக பதவியேற்றுக் கொண்டார். தமிழக ஆளுநர் கே.ரோசையா ஜெயலலிதாவுக்கு பதவி பிரமாணம் செய்து வைத்தார்.
நடந்து முடிந்த சட்டசபை தேர்தலில் அதிமுக 232 தொகுதிகளில் 134 தொகுதிகளை கைப்பற்றி அறுதிபெரும்பாண்மையுடன் ஆட்சியை தொடர்ந்து கைப்பற்றியது. இதனையடுத்து முதலமைச்சர் ஜெயலலிதா ஆறாவது முறையாக இன்று மீண்டும் ஆட்சியமைக்கிறார். முதலமைச்சராக ஜெயலலிதா பதவியேற்றதும் ஆளுநர் அவருக்கு மலர் கொத்து கொடுத்து வாழ்த்து தெரிவித்தார்.
பின்னர் புதிய அமைச்சரவையில் இடம்பெற்றுள்ள 28 அமைச்சர்களுக்கும் ஆளுநர் பதவி பிரமாணம் செய்து வைத்தார். சென்னை பல்கலைக்கழக நூற்றாண்டு விழா அரங்கத்தில் நடைபெற்ற இந்த பதவியேற்பு விழாவில் முக்கிய அரசியல் தலைவர்கள், பிரமுகர்கள் கலந்து கொண்டனர்.
திமுக சார்பில் விழாவில் ஸ்டாலின், பொன்முடி, சந்திரசேகர், சுப்ரமணியன் உள்ளிட்ட எம்.எல்.ஏ.,க்கள் கலந்து கொண்டுள்ளனர். மத்திய அரசின் சார்பில் அமைச்சர் வெங்கையா நாயுடு, பொன்.ராதாகிருஷ்ணன் ஆகியோர் கலந்துகொண்டார். இந்திய கம்யூனிஸ்ட் கட்சியின் தா.பாண்டியனும் இந்த விழாவில் கலந்து கொண்டுள்ளார்.