சென்னையில் நவம்பர் 12ஆம் தேதி வரை மழை பெய்யும் என்று தமிழ்நாடு வெதர்மேன் கணித்து, தனது சமூக வலைதளத்தில் பதிவு செய்துள்ளார்.
வளிமண்டல கீழ் அடுக்கு சுழற்சி, வடகிழக்கு பருவமழை மற்றும் வங்கக் கடலில் தோன்றும் காற்றழுத்த தாழ்வு காரணமாக, சென்னை உள்பட தமிழக முழுவதும் பரவலாக மிதமான மழை முதல் கனமழை வரை பெய்து வருகிறது.
குறிப்பாக, சென்னையில் சில மணி நேர இடைவெளி விட்டு மழை பெய்து வருவதாகவும், பல இடங்களில் மழை நீர் தேங்கி இருப்பதாகவும் தகவல்கள் வெளியாகி உள்ளன.
மழை குறித்த விவரங்களை சென்னை வானிலை ஆய்வு மையம் மற்றும் இந்திய வானிலை ஆய்வு மையம் தொடர்ந்து கணிப்புகள் வெளியிட்டு வருகின்றன. இந்நிலையில், தமிழ்நாடு வெதர்மேன் பிரதீப் ஜான் தனது சமூக வலைத்தளத்தில், நவம்பர் 12ஆம் தேதி வரை சென்னையில் மழை தொடரும் எனக் கூறியுள்ளார்.
மேலும், கன்னியாகுமரி, விருதுநகர், தூத்துக்குடி, ராமநாதபுரம், மதுரை, திண்டுக்கல், தேனி, தென்காசி, சிவகங்கை, நாகப்பட்டினம், திருவாரூர் மற்றும் டெல்டா மாவட்டங்களில் இன்று இரவு மழை பெய்யும் என்றும் தெரிவித்துள்ளார்.