தமிழகம், புதுச்சேரியில் 10ஆம் வகுப்பு தேர்வு நாளை தொடங்குகிறது. மாணவ-மாணவிகள் மட்டும் 7 லட்சத்து 99 ஆயிரத்து 980 பேர் எழுதுகிறார்கள். அவர்களில் 3 லட்சத்து 97 ஆயிரத்து 619 பேர் மாணவர்கள். 4 லட்சத்து 2 ஆயிரத்து 361 பேர் மாணவிகள்.
மேலும் தனித்தேர்வர்கள் எழுதுகிறார்கள். மொத்தத்தில் 8 லட்சத்து 60 ஆயிரம் மாணவ- மாணவிகள் தேர்வு எழுதுகிறார்கள்.
இவர்கள் தேர்வு எழுதுவதற்கு 1,700 மையங்கள் அமைக்கப்பட்டுள்ளன. ஒவ்வொரு மையத்திலும் பாதுகாப்பு போட ஏற்பாடு செய்யப்பட்டுள்ளது. மாணவர்கள் காப்பி அடிப்பதை தடுக்க, கண்காணிக்க 6 ஆயிரம் பேர் கொண்ட பறக்கும் படைகள் அமைக்கப்பட்டுள்ளன. வினாக்கள் மிகவும் பாதுகாப்பாக ரகசியமாக வைக்கப்பட்டு பலத்த பாதுகாப்பு போடப்பட்டுள்ளது.
இந்த தேர்விலும் மாணவர்கள் வினாத்தாளை வாசிக்க 10 நிமிடம் ஒதுக்கப்பட்டுள்ளது. காலை 10 மணிக்கு வினாத்தாள் கொடுக்கப்படும். அது வாசித்து முடிந்தவுடன் 10.10 மணிக்கு விடைத்தாள் வழங்கப்படும். பகல் 12.40 மணிக்கு தேர்வு முடிவடைகிறது.
தேர்வை சிறப்பாக நடத்த அனைத்து ஏற்பாடுகளையும் அரசு தேர்வுத்துறை இயக்குனர் வசந்தி ஜீவானந்தம் தலைமையில் செய்யப்பட்டுவருகிறது.
