மறைந்த முன்னாள் முதல்வர் ஜெயலலிதாவின் வாழ்க்கை வரலாற்றை மையமாக வைத்து தலைவி என்ற திரைப்படமும், குயின் என்ற இணையத்தளத் தொடரும் வெளியானது. குயின் தொடரில் ஜெயலலிதா வேடத்தில் ரம்யா கிருஷ்ணன் நடித்திருந்தார். தலைவி படத்தை விட குயின் இணையத்தள தொடர் நல்ல வரவேற்பை பெற்றது. இதனை இயக்குனர்கள் கௌதம் மேனனும், பிரசாத் முருகேசனும் இயக்கி இருந்தார்கள். இந்த தொடர் பரவலான வரவேற்பைப் பெற்ற நிலையில் தற்போது அதன் இரண்டாம் பாகம் தொடங்கியுள்ளதாக தகவல்கள் வெளியானது.
இந்நிலையில் முதல்பாகத்தில் ஜெயலலிதாவின் தாயார் சந்தியா வேடத்தில் நடித்த சோனியா அகர்வால் தற்போது படப்பிடிப்புத் தளத்தில், ரம்யா கிருஷ்ணனோடு இருக்கும் புகைப்படத்தைப் பகிர்ந்துள்ளார். இந்த புகைப்படங்கள் இணையத்தில் வைரலாகி வருகின்றன.
