இந்த ஆண்டின் மிகவும் எதிர்பார்க்கப்பட்ட படங்களில் ஒன்றாக ரஜினிகாந்த்- லோகேஷ் கனகராஜ் இணைந்துள்ள ‘கூலி’ படம் அமைந்துள்ளது. இந்த படத்தில் சத்யராஜ், நாகார்ஜுனா, சௌபின் சாஹிர், அமீர்கான், உபேந்திரா மற்றும் ஸ்ருதிஹாசன் ஆகியோர் முக்கிய வேடங்களில் நடித்துள்ளனர்.
அனிருத் இசையமைக்க, கிரிஷ் கங்காதரன் ஒளிப்பதிவு செய்ய சன் பிக்சர்ஸ் நிறுவனம் பிரம்மாண்டமாக தயாரித்துள்ளது. படம் ஆகஸ்ட் 14 ஆம் தேதி ரிலீஸாகவுள்ள நிலையில் தற்போது ப்ரமோஷன் பணிகள் நடைபெற்று வருகின்றன. இதற்கிடையே நேற்று இந்த படம் சென்சார் செய்யப்பட்டு ‘A’ சான்றிதழ் பெற்றுள்ளது.
தற்போது படத்தை விளம்பரப்படுத்தும் பணிகள் நடைபெற்று வரும் நிலையில் ஐதராபாத்தில் நடந்த ஒரு நிகழ்ச்சியில் பேசிய ரஜினிகாந்த் இயக்குனர் லோகேஷை ராஜமௌலியோடு ஒப்பிட்டு பாராட்டியுள்ளார். அதில் “தெலுங்கு சினிமாவுக்கு எப்படி ராஜமௌலியோ, அப்படி தமிழ் சினிமாவுக்கு லோகேஷ். அவரின் அனைத்துப் படங்களும் வெற்றி பெற்றுள்ளன” என பாராட்டியுள்ளார்.
