”1967-ல் திமுக ஆட்சிக்கு வந்ததுனால தான் குடிநீர் பிரச்சனையே”: டிவிட்டரில் பொங்கிய எச்.ராஜா…

குடிநீர் பிரச்சனைக்கு திமுக தான் காரணம் என பாஜக தேசியச் செயலாளர் எச்.ராஜா டிவிட்டரில் கருத்து தெரிவித்துள்ளார்.

தமிழகத்தில் பல நாட்களாக தண்ணீர் பிரச்சனை, மக்களை அவதிக்குள்ளாக்கி வருகிறது. மேலும் தமிழக அரசு குடிநீர் பிரச்சனையைக் குறித்து நடவடிக்கை எடுத்து வருகிறது.

இந்நிலையில் பா.ஜ.க. தேசியச் செயலாளர் எச்.ராஜா, தமிழகத்தில் நிலவும் தண்ணீர் பிரச்சனையை குறித்து தனது டிவிட்டர் பக்கத்தில் கருத்து தெரிவித்துள்ளார். அதில், குடிநீர் பற்றாக்குறைக்கு திமுக தான் காரணம் என்றும், 1967-ல் திமுக ஆட்சிக்கு வந்ததிலிருந்து தமிழகத்தில் பல நீர்நிலைகளை அழித்துவிட்டது எனவும் தெரிவித்துள்ளார்.

மேலும் எச்.ராஜா, மீத்தேன், நீட், நெடுவாசல் பிரச்சனைகளுக்கு முக்கிய காரணம் திமுக தான் என்றும், மேலும் திமுக-காங்கிரஸ் கூட்டணியில் இருந்தபோது தான் இந்த திட்டங்களெல்லாம் நடைமுறைக்கு வந்தன என்றும் தெரிவித்துள்ளார்.

நேற்று திமுக தலைவர் ஸ்டாலினைக் குறித்து ”புளி பழுப்பது சாம்பாருக்கு தான்” என்று கருத்து தெரிவித்ததால் சமூக வலைத்தளத்தில் எச்.ராஜா பெரும் கேலிக்கு உள்ளாக்கப்பட்டார்.

இந்நிலையில் தற்போது தமிழகத்தில் உள்ள அனைத்து பிரச்சனைகளுக்கும் திமுக தான் காரணம் என டிவிட்டரில் கருத்து தெரிவித்திருப்பது, சமுக வலைத்தளவாசிகளுக்கு கேலி செய்வதற்கான மற்றொரு விஷயமாகவும் அமைந்திருப்பது குறிப்பிடத்தக்கது.

குடிநீர் பற்றாக்குறைக்கு காரணம் நான் மீண்டும் மீண்டும் கூறுகிறேன் திமுக 67ல் ஆட்சிக்கு வந்ததிலிருந்து கொடுத்துள்ள பொறுப்பற்ற ஆட்சியே காரணம். சென்னை மற்றுமல்ல தமிழகம் முழுவதும் நீர்நிலைகள் அழிப்பு. மதுரையில் உயர்நீதிமன்ற கிளை நீர்நிலையின் மீது. வெட்கக்கேடு.@PTTVOnlineNews

— H Raja (@HRajaBJP) July 2, 2019

காளை மற்றும் எருது காட்சிப்படுத்தப்படும் விலங்குகள் பட்டியலில் சேர்த்தது, நெடுவாசல், மீத்தேன், நீட், கர்நாடகா காவிரியில் தமிழகத்தை கேட்காமல் அணைகள் கட்டியது, கச்சத்தீவை தாரை வார்த்தது இவை அனைத்தும் திமுக காங்கிரஸ் ஆட்சிக் காலத்தில் இன்று கோரிக்கை, போராட்ட வேஷமா? @PTTVOnlineNews

— H Raja (@HRajaBJP) July 2, 2019