மன்னிப்பு கேட்ட கல்லூரி மாணவிக்கு முத்தம் கொடுத்த இளைஞர்.. கைது செய்து சிறையில் அடைத்த போலீஸ்..!

இருசக்கர வாகனத்தில் வந்த கல்லூரி மாணவி ஒருவர் எதிரே வந்த இளைஞரின் பைக் மீது மோதி விட்ட நிலையில் அதற்கு அவர் மன்னிப்பு கேட்டார். ஆனால்  அந்த இளைஞர் திடீரென அந்த மாணவியை கட்டிப்பிடித்து முத்தம் கொடுத்ததால் மாணவி அளித்த புகாரின் அடிப்படையில் தற்போது அவர் கைது செய்யப்பட்டு சிறையில் அடைக்கப்பட்டுள்ளார்.

கோவை மாவட்டம் குனியமுத்தூர் என்ற பகுதியில் குண்டும் குழியுமாக இருந்த சாலையில் கல்லூரி மாணவி ஒருவர் இருசக்கர வாகனத்தில் சென்று கொண்டிருந்தார். அப்போது அவர் எதிர்பாராத விதமாக பேலன்ஸ் தவறி எதிரே வந்த இளைஞரின் ஸ்கூட்டர் மீது மோதிவிட்டார்.

இதனை அடுத்து அந்த இளைஞரிடம் சிரித்து கொண்டே மன்னிப்பு கேட்ட கல்லூரி மாணவி தனது வாகனத்தை எடுத்துவிட்டு சென்றுவிட்டார். இந்த நிலையில் மாணவியை சிறிது தூரம் துரத்தி சென்ற அந்த இளைஞர் திடீரென எதிர்பாராத விதமாக அவரை தடுத்து நிறுத்தி கட்டி பிடித்து முத்தம் கொடுத்ததாக தெரிகிறது.

இதனால் அதிர்ச்சி அடைந்த அந்த மாணவி காவல் நிலையத்தில் புகார் செய்ய காவல்துறையினர் அந்த இளைஞரை கைது செய்து சிறையில் அடைத்தனர். அவரிடம் மேலும் விசாரணை நடந்து வருகிறது என்பது குறிப்பிடத்தக்கது.

Edited by Mahendran