யானை தாக்கி பலியானவர் குடும்பத்துக்கு ரூ.2.5 லட்சம் நிதியுதவி
வியாழன், 23 ஜூன் 2011 (13:12 IST)
தேன்கனிக்கோட்டை அருகே யானை தாக்கி பலியானவர் குடும்பத்துக்கு இரண்டரை லட்சம் ரூபாய் நிதியுதவியை முதலமைச்சர் ஜெயலலிதா வழங்க உத்தரவிட்டுள்ளார்.
இது தொடர்பாக அவர் இன்று வெளியிட்டுள்ள செய்திக்குறிப்பில், கிருஷ்ணகிரி மாவட்டம் தேன்கனிக்கோட்டை வட்டம், உனிசேநத்தம் கிராமத்தை சேர்ந்த சின்னப்பா என்பவரின் மகன் நாராயணப்பா 19.6.2011 அன்று காட்டு யானை தாக்கி உயிரிழந்தார் என்ற செய்தியை அறிந்து நான் மிகவும் துயருற்றேன்.
நாராயணப்பாவை இழந்து வாடும் அவர்தம் குடும்பத்திற்கு எனது ஆழ்ந்த இரங்கலையும், அனுதாபத்தையும் தெரிவித்துக்கொள்கிறேன்.
இந்த துயர சம்பவத்தில் உயிரிழந்தவரின் குடும்பத்திற்கு வனத்துறை மூலம் ஒரு லட்சத்து ஐம்பதாயிரம் ரூபாய் வழங்க உத்தரவிட்டுள்ளதுடன், முதலமைச்சரின் பொது நிவாரண நிதியிலிருந்தும் ஒரு லட்சம் ரூபாய் வழங்க நான் ஆணையிட்டுள்ளேன் என்று ஜெயலலிதா கூறியுள்ளார்.
