காவல்துறை ஆணையருக்கு சென்னை உயர் நீதிமன்றம் உத்தரவு!
செவ்வாய், 30 செப்டம்பர் 2008 (17:01 IST)
அ.இ.அ.தி.மு.க. சட்டமன்ற உறுப்பினர் கலைராஜனுக்கு அவரது மனுவை பரிசீலனை செய்து துப்பாக்கி வைத்திருப்பதற்கான உரிமத்தை (லைசென்ஸ்) 4 வாரத்துக்குள் வழங்க வேண்டும் என்று மாநகர காவல்துறை ஆணையர் சேகருக்கு சென்னை உயர் நீதிமன்றம் உத்தரவிட்டுள்ளது.
அ.இ.அ.தி.மு.க. சட்டமன்ற உறுப்பினர் கலைராஜன் துப்பாக்கி வைத்திருப்பதற்கான உரிமம் கேட்டு விண்ணப்பித்திருந்தார். ஆனால் அவர் மீது 3 வழக்குகள் பதிவு செய்யப்பட்டிருப்பதால் உரிமம் வழங்க முடியாது என்று கூறி அவரது மனுவை மாநகர காவல்துறை ஆணையர் நிராகரித்தார்.
இதை எதிர்த்து சென்னை உயர் நீதிமன்றத்தில் கலைராஜன் மனுத்தாக்கல் செய்தார். இந்த மனுவை விசாரித்த நீதிபதி, அரசியல் பழி வாங்கும் நடவடிக்கை காரணமாக கலைராஜன் மீது வழக்குகள் போடப்பட்டுள்ளது என்றும் எனவே கலைராஜனுக்கு உரிமம் வழங்க வேண்டும் என்றும் மாநகர காவல்துறை ஆணையருக்கு உத்தரவிட்டார்.
இதையடுத்து மாநகர காவல்துறை ஆணையர் சேகர் மேல் முறையீட்டு மனுத் தாக்கல் செய்தார். அந்த மனு தலைமை நீதிபதி ஏ.கே. கங்குலி, நீதிபதி எப்.எம். இப்ராஹிம் கலிபுல்லா அடங்கிய அமர்வு முன்பு இன்று விசாரணைக்கு வந்தது.
மனுவை விசாரித்த நீதிபதிகள், ஆணையர் தாக்கல் செய்த மேல் முறையீட்டு மனுவை தள்ளுபடி செய்ததோடு, கலைராஜனுக்கு உரிமம் வழங்க வேண்டும் என்ற உயர் நீதிமன்ற நீதிபதி அளித்த உத்தரவு செல்லும் என்றும் சட்டமன்ற உறுப்பினர் கலைராஜன், காவல்துறை ஆணையரிடம் உரிமம் கேட்டு புதிதாக விண்ணப்பம் செய்ய வேண்டும் என்றும் உத்தரவிட்டனர்.
