சென்னை ஸ்பென்சர் பிளாசாவில் தீ விபத்து: பல லட்சம் சேதம்!
வெள்ளி, 5 செப்டம்பர் 2008 (09:48 IST)
சென்னை ஸ்பென்சர் பிளாசாவில் நேற்று இரவு ஏற்பட்ட தீவிபத்தில் லட்சக்கணக்கில் மதிப்புள்ள துணிகள் எரிந்து நாசமானது.
சென்னை அண்ணாசாலையில் உள்ள ஸ்பென்சர் பிளாசா கட்டிடத்தின் முதல் மாடியில் ஸ்கெல்லர் என்ற ரெடிமேடு துணிக்கடையில் நேற்று இரவு 10.20 மணிக்கு திடீரென தீ விபத்து ஏற்பட்டது.
இதை பார்த்த பொது மக்களும், வேலை செய்பவர்களும் அலறி அடித்து கொண்டு வெளியே கூடினர். தகவல் அறிந்ததும் மத்திய சென்னை தீ அணைப்பு உதவி கோட்ட அதிகாரி சண்முகம் தலைமையில் எழும்பூர், மயிலாப்பூர், சைதாப்பேட்டை, தேனாம்பேட்டை, கீழ்ப்பாக்கம், உயர் நீதிமன்றம் ஆகிய தீயணைப்பு நிலையங்களில் இருந்து 8 வண்டிகளில் தீயணைப்பு படைவீரர்கள் வந்தனர்.
அவர்கள் 20 நிமிடங்கள் போராடி தீயை அணைத்தனர். பக்கத்தில் உள்ள கடைக்கும் புகை பரவியதால் அந்த கடையின் கண்ணாடி உடைக்கப்பட்டு புகை வெளியேற்றப்பட்டது.
மின் கோளாறு காரணமாக தீ விபத்து ஏற்பட்டிருக்கலாம் என்று காவல்துறையினர் தெரிவித்தனர். இருந்தாலும் காவல்துறையினர் தீவிர விசாரணை நடத்தி வருகின்றனர்.
இந்த தீவிபத்தால் பல லட்சம் ரூபாய் மதிப்புள்ள துணிகள் எரிந்து நாசமானது.
