விலைவாசியை கட்டுப்படுத்த வேண்டும், 6-வது ஊதியக்குழு பரிந்துரையில் உள்ள பாதகமான அம்சங்களை நீக்க வேண்டும் என்பது உள்ளிட்ட பல்வேறு கோரிக்கைகளை வலியுறுத்தி சி.ஐ.டி.யு., ஏ.ஐ.டி.யு.சி. உள்ளிட்ட பல்வேறு தொழிற்சங்கங்கள் இன்று நாடு தழுவிய வேலை நிறுத்தத்தில் ஈடுபட்டன.
இந்த வேலை நிறுத்த போராட்டத்துக்கு தமிழக அரசு தார்மீக ஆதரவு கொடுத்த போதிலும், பேருந்துகள் வழக்கம் போல இயக்கப்படும் என்று அறிவித்தது. இதனால் தமிழகத்தில் இன்று அரசு பேருந்துகள், தனியார் பேருந்துகள், ஆட்டோக்கள் அனைத்தும் வழக்கம் போல ஓடின. ரயில் போக்குவரத்தும் திட்டமிட்டபடி நடந்தது.
விமானநிலைய ஊழியர்களும் இந்த போராட்டத்தில் ஈடுபட்டதால் சென்னையில் சில விமானங்கள் ரத்து செய்யப்பட்டன. வங்கி, தபால் ஊழியர்கள் போராட்டத்தில் பங்கேற்றதால் தொலை தொடர்பு, பண பரிவர்த்தனைகளில் பாதிப்பு ஏற்பட்டது. மற்றபடி பள்ளி, கல்லூரிகள் அரசு, தனியார் அலுவலகங்கள் இயக்கத்தில் எந்தவித பாதிப்பும் ஏற்படவில்லை.
