ஒகேனக்கல் தமிழகத்துக்கே சொந்தம்: தலைமை செயலர்!
செவ்வாய், 19 ஆகஸ்ட் 2008 (16:30 IST)
ஒகேனக்கல் பகுதி தமிழகத்துக்குதான் சொந்தமானது. இதில் எந்தவித சந்தேகமும் வேண்டாம் என்று தமிழக அரசின் தலைமைச் செயலர் எல்.கே.திரிபாதி கூறியுள்ளார்.
ஜப்பானிய அரசாங்கத்தின் ஊரக வளர்ச்சி நிதியத்தின் சார்பில் சென்னையில் உள்ள ஜப்பானிய துணை தூதரகத்தில் புகைப்படக் கண்காட்சி நடந்தது. இந்த கண்காட்சியை தமிழக அரசின் தலைமைச் செயலர் எல்.கே.திரிபாதி தொடங்கிவைத்தார்.
பின்னர் பேசிய அவர், ஒரு சில அரசியல் கட்சிகள் தங்களது சுயநலத்துக்காக ரூ.1,334 கோடி ஒகேனக்கல் கூட்டுக்குடிநீர் திட்டத்தை நிறைவேற்ற விடாமல் குழப்பம் விளைவித்து வருகிறது.
தற்போது ஒகேனக்கல் திட்ட விவகாரத்தில் பிரச்சனைகள் நிலவுவதால், அதுபற்றிய விளக்கத்தை அளிக்க விரும்புகிறேன். ஒகேனக்கல் பகுதி தமிழகத்துக்குதான் சொந்தமானது. இதில் எந்தவித சந்தேகமும் வேண்டாம்.
இந்த கூட்டுக்குடிநீர் திட்டம் என்பது இப்போது முடிவெடுத்து இப்போதே செயல்படுத்த ஆரம்பிக்கவில்லை. காவிரியில் இருந்து தமிழகத்துக்குச் சொந்தமான 1.4 டி.எம்.சி. தண்ணீர் பெறுவதற்காக, இரண்டு மாவட்டங்களில் வாழும் 30 லட்சம் மக்களின் தாகத்தை தீர்க்கவே கொண்டுவரப்பட்டது.
