காங்கிரஸ் தொண்டர்களுக்கு கிருஷ்ணாசாமி நன்றி!
திங்கள், 7 ஏப்ரல் 2008 (13:08 IST)
சோனியா காந்தியின் காரைக்குடி வருகையை பிரம்மாண்டமான வெற்றியாய் அமைத்த தொண்டர்களுக்கு தமிழக காங்கிரஸ் தலைவர் கிருஷ்ணசாமி நன்றி தெரிவித்துள்ளார்.
இது தொடர்பாக அவர் இன்று வெளியிட்டுள்ள அறிக்கையில், சோனியா காந்தியின் காரைக்குடி வருகை வரலாறு போற்றும் வகையில் பிரம்மாண்டமான வெற்றியாய் அமைந்தது.
கொளுத்தும் வெயிலையும் பொருட்படுத்தாது லட்சக்கணக்கான மக்கள், குறிப்பாக பெண்கள் விவசாயப் பெருமக்கள் அலை கடலென திரண்டு வந்து அமர்ந்திருந்த காட்சியைக் கண்ட சோனியா காந்தி நெஞ்சம் நெகிழ்ந்துப் போனார். எனவேதான் அவர் தனது உரையில் பெருமகிழ்ச்சியை வெளிப்படுத்தினார்.
மாபெரும் அப்பொதுக் கூட்டத்தை பத்திரிகைகளும் பாராட்டியுள்ளன. அந்த அளவுக்கு திரண்டு வந்த திரளான மக்களுக்கும், பேரணிப் பொதுக்கூட்டம் சிறப்பான வெற்றிக்கு உறுதுணையாக இருந்த நிதியமைச்சர் ப.சிதம்பரம், மத்திய அமைச்சர்கள், நாடாளுமன்ற, சட்டமன்ற உறுப்பினர்கள், மாவட்டத் தலைவர்கள், காங்கிரஸ் நிர்வாகிகள், தொண்டர்கள் அனைவருக்கும் தமிழ்நாடு காங்கிரஸ் கமிட்டி சார்பில் எனது நன்றியை தெரிவித்துக் கொள்கிறேன் என்று கிருஷ்ணசாமி கூறியுள்ளார்.
