புதுக்கோட்டை ஜல்லிக்கட்டு: 2 பேர் ப‌‌லி- 140 பேர் காயம்!

புதுக்கோட்டையில் நேற்று நடந்த ஜல்லிக்கட்டில் காளைகள் முட்டி தள்ளியதில் 2 பேர் இற‌ந்தன‌ர். 140 பேர் காயமடைந்தனர்.

புதுக்கோட்டை திருவப்பூர் முத்துமாரியம்மன் பூச்சொரிதல் விழாவினை முன்னிட்டு திருவப்பூர் கவிநாட்டு கண்மாயில் நேற்று ஜல்லிக்கட்டு நடைபெற்றது. இதில் புதுக்கோட்டை, திருச்சி, தஞ்சாவூர், சிவகங்கை உள்ளிட்ட பல்வேறு மாவட்டங்களில் இருந்து லாரி, வேன்களில் கொண்டு வரப்பட்ட 600-க்கும் மேற்பட்ட காளைகள் கலந்து கொண்டன.

இந்த காளைகள் தொழுவத்திற்கு கொண்டு வரப்பட்டு ஒவ்வொன்றாக அவிழ்த்து விடப்பட்டன. சீறிப்பாய்ந்து வந்த காளைகளை இளைஞர்கள் பாய்ந்து சென்று அடக்கினர். அப்போது ஆக்ரோஷமாக சீறிப்பாய்ந்து வந்த முரட்டு காளைகளை அடக்க முயற்சித்த புதுக்கோட்டையை அடுத்த கத்தக்குறிச்சி அருகே உள்ள நம்புக்குழியை சேர்ந்த பாண்டி (28), புதுக்கோட்டை காந்திநகரைச் சேர்ந்த பழனிசாமி (45) ஆகிய 2 பேரும் காளைகள் முட்டி தள்ளியதில் இறந்தனர்.

மேலும் ஜல்லிக்கட்டில் காளைகள் முட்டி 140 பேர் காயமடைந்தனர். அவர்கள் புதுக்கோட்டை அரசு பொது மருத்துவமனையில் அனுமதிக்கப்பட்டனர். இதில் ஆபத்தான நிலையில் இருந்த 3 பேர் தஞ்சை மருத்துவக்கல்லூரி மரு‌‌த்துவமனை‌க்கு மேல் சிகிச்சைக்காக கொண்டு செல்லப்பட்டு சேர்க்கப்பட்டனர்.