சென்னையை அடுத்த நெற்குன்றத்தைச் சேர்ந்த மருத்துவர் பிரகாஷ். இவர் அண்ணாநகரில் மருத்துவமனை ஒன்று நடத்தி வந்தார். இங்கு சிகிச்சைக்கு வந்த பெண்களை மிரட்டி, ஆபாச படம் எடுத்து இணைய தளத்தில் வெளியிட்டு பணம் சம்பாதித்த அவர் மீது கடந்த 2001 ஆம் ஆண்டு வடபழனி காவல் நிலையத்தில் புகார் தெரிவிக்கப்பட்டது.
இதையடுத்து மருத்துவர் பிரகாஷ், அவருக்கு உடந்தையாக இருந்த சரவணன், விஜயன், ஆசிப், நிக்சன் ஆகியோரும் கைது செய்யப்பட்டனர். இவர்கள் மீது பல்வேறு பிரிவுகளின் கீழ் வழக்குகள் பதிவு செய்யப்பட்டன.
இந்த வழக்கு சென்னை 5வது விரைவு நீதிமன்றத்தில் நடந்து வந்தது. இந்த வழக்கில் நேற்று நீதிபதி ராதா, மருத்துவர் பிரகாஷ் உள்பட 4 பேர் குற்றவாளிகள் என அறிவித்தார். இதில் நிக்சன் என்பவர் விடுதலை செய்யப்பட்டார். மற்ற 4 பேருக்கும் தண்டனை விவரம் நாளை அறிவிக்கப்படும் என்று நீதிபதி அறிவித்தார்.
