பலத்த பாதுகாப்புக்கிடையில் உலக புகழ் பெற்ற அலங்காநல்லூர் ஜல்லிக்கட்டு போட்டி இன்று துவங்கியது. சீறி வரும் காளையை ஏராளமான இளைஞர்கள் பாய்ந்து அடக்கினர்.
பொங்கல் பண்டிகையை முன்னிட்டு சீறிப்பாயும் காளைகளை இளைஞர்கள் வீரத்துடன் அடக்கும் ஜல்லிக்கட்டு தமிழகம் முழுவதும் பல்வேறு பகுதிகளில் நடத்தப்பட்டு வருகிறது. ஜல்லிக்கட்டில் பங்கேற்கும் மாடுகள் துன்புறுத்தப்படுவதாகவும், மாடு பிடிக்கும் வீரர்கள் மட்டுமின்றி பார்வையாளர்களும் மாடுகளால் தாக்கப்பட்டு காயமடைவதுடன் உயிரிழக்கும் அபாயமும் ஏற்படுவதால் ஜல்லிக்கட்டுக்கு தடை விதித்து உச்சநீதிமன்றம் சமீபத்தில் உத்தரவிட்டது.
ஆனால் தென் தமிழகத்தில் கடும் எதிர்ப்பு கிளம்பியது. ஜல்லிக்கட்டுக்கு தடை விதிக்க எதிர்ப்பு தெரிவித்து உண்ணாவிரதம் உள்ளிட்ட போராட்டங்களில் மக்கள் ஈடுபட்டனர். இதை தொடர்ந்து தமிழக அரசு உச்ச நீதிமன்றத்தில் மறு ஆய்வு மனு ஒன்றை தாக்கல் செய்தது. இந்த மனுவை விசாரித்த உச்ச நீதிமன்றம், நிபந்தனைகளுடன் ஜல்லிக்கட்டுக்கு விதிக்கப்பட்ட தடையை நீக்கியது.
மாவட்ட ஆட்சியர் ஜல்லிக்கட்டு போட்டி குறித்து மூன்று தினங்களுக்கு முன்பு தகவல் தெரிவிக்க வேண்டும். காளைகள் துன்புறுத்தப்படாமல் இருப்பதற்கு மாவட்ட நிர்வாகம் உறுதி அளிக்க வேண்டும். போட்டி முழுவதும் வீடியோவில் பதிவு செய்யப்பட வேண்டும். பார்வையாளர்கள் காயமடைவதை தடுக்க முன்னெச்சரிக்கை நடவடிக்கை எடுக்க வேண்டும். பிராணிகள் நல வாரிய அதிகாரிகள் பார்வையிட அனுமதிக்கப்பட வேண்டும். போட்டி முடிந்து இரண்டு வாரங்களுக்குள் மாவட்ட ஆட்சியர் அறிக்கை தாக்கல் செய்ய வேண்டும் ஆகிய நிபந்தனைகள் விதிக்கப்பட்டுள்ளன.
