மெல்போர்ன் ஒருநாள் : ஆஸி.யை 5 விக்கெட்டுகளில் வென்றது இந்தியா!

முத்தரப்பு ஒருநாள் போட்டித் தொடரின் 4-வது ஆட்டத்தில், இந்திய அணி 5 விக்கெட்டுகள் வித்தியாசத்தில் ஆஸ்ட்ரேலிய அணியை வீழ்த்தியது.

இந்தப் போட்டியில் வென்றதன் மூலம், இந்தத் தொடரில் இந்தியா 8 புள்ளிகளைப் பெற்று முன்னிலையில் உள்ளது. ஆஸ்ட்ரேலியா 7 புள்ளிகளையும், இலங்கை 2 புள்ளிகளையும் பெற்று அடுத்தடுத்த நிலையில் உள்ளன.

மெல்போர்னில் நடைபெற்ற இன்றைய போட்டியில் 160 ரன்கள் என்றால் வெற்றி என்ற நிலையில் களமிறங்கிய இந்திய அணி, 45.5 ஓவர்களில் 5 விக்கெட்டுகளை இழந்து இலக்கை அடைந்தது.

துவக்க ஆட்டக்காரர் வீரேந்திர சேவாக் 11 ரன்களிலும், பதான் 18 ரன்களிலும் ஆட்டமிழந்தனர். அதன்பின், சச்சின் டெண்டுல்கருடன் இணை சேர்ந்த கம்பீர் 20 ரன்களிலும், யுவராஜ் சிங் 3 ரன்களிலும் ஆட்டமிழக்கவே, இந்தியாவுக்கு சற்று பின்னடைவு ஏற்பட்டது.

ஆனால், சச்சின் டெண்டுல்கர் நிதானமாக விளையாடி 44 ரன்கள் சேர்த்தார். அவரைத் தொடர்ந்து ரோஹித் ஷர்மாவும் டோனியும் இணைந்து நன்றாக பேட் செய்து, அணியை வெற்றி பெறச் செய்தனர். ஷர்மா மற்றும் டோனி ஆகியோர் ஆட்டமிழக்காமல் முறையே 39 மற்றும் 17 ரன்கள் எடுத்தனர்.

ஆஸ்ட்ரேலியா தரப்பில் ஜான்சன் 2 விக்கெட்டுகளையும், பிரட் லீ, பிரேக்கன் மற்றும் ஸ்டுவர்ட் கிளார்க் ஆகியோர் தலா ஒரு விக்கெட்டையும் வீழ்த்தினர்.

முன்னதாக, இப்போட்டியில் பூவா, தலையா வென்று முதலில் களமிறங்கிய ஆஸ்ட்ரேலிய அணி, 43.1 ஓவர்களில் அனைத்து விக்கெட்டுகளையும் இழந்து 159 ரன்கள் மட்டுமே எடுத்தது.

அந்த அணியின் துவக்க ஆட்டக்காரர்களான கில்கிறிஸ்ட் ரன் ஏதும் எடுக்காமலும், பான்டிங் 9 ரன்களிலும் ஆட்டமிழந்தனர்.

அதைத்தொடர்ந்து, ஹைடன் 25 ரன்களிலும், மைக்கேல் கிளார்க் 11 ரன்களிலும், சைமன்ட்ஸ் 14 ரன்களிலும் ஆட்டமிழந்த நிலையில், நிதானமாக பேட் செய்த மைக்கேல் ஹஸ்சே ஆட்டமிழக்காமல் 65 ரன்கள் எடுத்து, அணியின் ரன் எண்ணிக்கையை ஓரளவு உயர்த்தினார்.

அதன்பின் களமிறங்கிய ஹிதின், பிரட் லீ, ஜான்சன், பிராக்கென் ஆகியோர் சொற்ப ரன்களில் ஆட்டமிழந்தனர்.

ஆஸ்திரேலிய அணியின் முக்கிய ஆட்டக்காரர்களான ஹைடன், பான்டிங், சைமன்ட்ஸ் ஆகியோரை வீழ்த்திய இஷாந்த் ஷர்மா 4 விக்கெட்டுகளையும், ஸ்ரீசாந்த் 3 விக்கெட்டுகளையும், பதான் 2 விக்கெட்டுகளையும், ஹர்பஜன் சிங் ஒரு விக்கெட்டையும் கைப்பற்றினர்.

இப்போட்டியில் சிறப்பாக பந்துவீசி, ஆஸ்ட்ரேலிய ஆட்டக்காரர்களைத் திக்குமுக்காடச் செய்த இஷாந்த் ஷர்மாவுக்கு ஆட்ட நாயகன் விருது வழங்கப்பட்டது.