அணுசக்தி ஒப்பந்தம் தொடர்பாக சர்வதேச அணுசக்தி முகமையுடன் மத்திய அரசு பேச்சு நடத்தலாம், ஆனால் அந்தப் பேச்சின் முடிவுகளை நிராகரிக்கும் உரிமையை தங்களுக்குக் கண்டிப்பாக வழங்க வேண்டும் என்று இடதுசாரிகள் கூறியுள்ளனர் என்று தகவலறிந்த வட்டாரங்கள் தெரிவிக்கின்றன.
இந்திய-அமெரிக்க அணுசக்தி ஒப்பந்தம் தொடர்பாக அமைக்கப்பட்டுள்ள ஐ.மு.கூட்டணி - இடதுசாரிகள் உயர்மட்டக் குழுவின் 6-வது கூட்டம் வருகிற 16-ஆம் தேதி நடக்க இருந்தது. ஆனால், அணு சக்தி ஒப்பந்த விவகாரத்தை நாடாளுமன்றத்தில் விவாதிப்பது என்று முடிவெடுக்கப்பட்டதால் அக்கூட்டம் தள்ளிவைக்கப்பட்டது.
இந்த நிலையில், இன்று காலை உயர்மட்டக் குழுவின் தலைவரும், மத்திய அயலுறவு அமைச்சருமான பிரணாப் முகர்ஜி, மார்க்சிஸ்ட் கம்யூனிஸ்ட் கட்சியின் தலைவர்கள் பிரகாஷ் காரத், சீதாராம் யெச்சூரி ஆகியோரைச் சந்தித்து, 16 -ஆம் தேதி மாலை 4 மணிக்கு கூட்டத்தை வைத்துக் கொள்ளலாம் என்ற முடிவைத் தெரிவித்தார் என்று தகவலறிந்த வட்டாரங்கள் கூறியுள்ளன.
