சீன விஞ்ஞானிகள் ராணுவ நடவடிக்கைகளுக்காக, கொசு அளவுள்ள மிகச் சிறிய ட்ரோனை உருவாக்கியுள்ளதாக சவுத் சைனா மார்னிங் போஸ்ட் செய்தி வெளியிட்டுள்ளது. இந்த மைக்ரோ ட்ரோன், மத்திய சீனாவின் ஹுனான் மாகாணத்தில் உள்ள தேசிய பாதுகாப்பு தொழில்நுட்ப பல்கலைக்கழகத்தின் ரோபோடிக்ஸ் ஆய்வகத்தால் உருவாக்கப்பட்டுள்ளது.
இந்தக் கொசு அளவுள்ள ட்ரோன், இரண்டு சிறிய இறக்கைகளையும், அவற்றின் இருபுறமும் இலை போன்ற அமைப்புகளையும் கொண்டிருந்ததாக கூறப்படுகிறது. மேலும், மூன்று முடி போன்ற மெல்லிய "கால்களும்" இருந்தன. இது ஒரு ஸ்மார்ட்போன் மூலம் கட்டுப்படுத்தப்பட்டதுடன், தோராயமாக ஒரு கொசுவின் அளவுக்கு அதாவது சுமார் 1.3 சென்டிமீட்டர் நீளம் இருந்தது.
இத்தகைய சிறிய ட்ரோன்கள், ரகசிய ராணுவ நடவடிக்கைகளுக்கு மிகவும் முக்கியமானதாக இருக்கும். ஏனெனில் அவை எளிதில் கண்டறியப்படாமல், கண்காணிப்பு அல்லது உளவு பணிகளுக்குப் பயன்படுத்தப்படலாம்.
அவசர காலங்களில் இடிபாடுகள் அல்லது குப்பைகளுக்கு இடையில் ஊடுருவி, தப்பி பிழைத்தவர்களைக் கண்டறிய இவை உதவும். மைக்ரோ ட்ரோன்கள் காற்று தரம் அல்லது நீரின் தரம் போன்ற சுற்றுச்சூழல் நிலைமைகளை கண்காணிக்க சென்சார்களுடன் பொருத்தப்படலாம்.
