வெண்ணிலா கபடி குழு திரைப்படம் மூலமாக நடிகராக அறிமுகமான விஷ்ணு விஷால் அதன் பின்னர் முண்டாசுப்பட்டி, ஜீவா, இன்று நேற்று நாளை மற்றும் ராட்சசன் ஆகிய வெற்றிப் படங்களைக் கொடுத்து தனக்கென தமிழ் சினிமாவில் ஒரு மார்க்கெட்டை உருவாக்கியுள்ளார். அவர் இப்போது ராம்குமார் இயக்கத்தில் ஒரு படத்தில் நடித்து வருகிறார். சமீபத்தில் அவர் நடிப்பில் வெளியான கட்டா குஸ்தி திரைப்படம் மிகப்பெரிய வெற்றியைப் பெற்றது.
தற்போது சில படங்களில் நடித்து வரும் விஷ்ணு விஷால் திரைப்பட தயாரிப்பிலும் ஈடுபட்டு வருகிறார். இந்நிலையில் தற்போது அவர் தனக்கு பெண் குழந்தை பிறந்துள்ள மகிழ்ச்சியான செய்தியைப் பகிர்ந்துள்ளார். விஷ்ணு விஷால் சில ஆண்டுகளுக்கு முன்னர் பேட்மிண்ட்டன் வீராங்கனை ஜூவாலா கட்டாவைத் திருமணம் செய்துகொண்ட நிலையில் தற்போது அவர்களுக்குப் பெண் குழந்தை பிறந்துள்ளது.
இந்நிலையில் சினிமாவில் ஆரம்ப காலகட்டத்தில் தான் சந்தித்த புறக்கணிப்புகள் குறித்து அவர் பேசியுள்ளார். அதில் “சினிமாவில் ஆரம்ப காலகட்டத்தில் நான் நிறைய புறக்கணிப்புகளை சந்தித்தேன். காதல் படத்தில் நான்தான் நடிப்பதாக இருந்தது. ஆனால் அது நடக்கவில்லை. அதுபோல விஜய் ஆண்டனியின் ‘நான்’ படத்திலும் முதலில் நான்தான் நடிப்பதாக இருந்தது. ஆனால் காரணமே இன்றி அதில் இருந்து நீக்கப்பட்டேன். அதே போல சென்னை 28 படத்தின் ஆடிஷனுலும் கலந்துகொண்டேன்” எனக் கூறியுள்ளார்.
