நடிகர் கமல்ஹாசன் நடித்த விக்ரம் திரைப்படம் மிகப்பெரிய வெற்றியைப் பெற்றதால், அவரின் சம்பளம் பல மடங்கு உயர்ந்து இப்போது ஒன்றுக்கும் மேற்பட்ட படங்களில் நடித்துவருகிறார். இந்தியன் 2 ஷூட்டிங்கை முடித்துள்ள கமல் அடுத்து கல்கி 2898 படத்தில் விலல்னாக நடிக்க 150 கோடி ரூபாய் சம்பளம் பெற்றுள்ளதாக தகவல்கள் வெளியாகின. இதற்கிடையில் ஹெச் வினோத் இயக்கத்திலும் ஒரு படத்தில் நடிக்க உள்ளார்.
இந்நிலையில் இந்த படத்தின் டைட்டில் பற்றி சமூகவலைதளங்களில் தகவல்கள் பரவி வருகின்றன. முதலில் மர்மயோகி என தலைப்பு வைக்கப்பட்டுள்ளதாக சொல்லப்பட்ட நிலையில் இப்போது ‘தலைவன் இருக்கின்றான்’ என்று தலைப்பு வைக்கப்பட்டுள்ளதாக அதிகாரப்பூர்வமற்ற தகவல்கள் வெளியாகியுள்ளன. சில ஆண்டுகளுக்கு முன்னர் இதே பெயரில் கமல்ஹாசன் ஒரு படத்தை தொடங்க இருந்தார் என்பது குறிப்பிடத்தக்கது.
