தாமதமாகும் காவல்துறை அனுமதி.. தள்ளி போகிறதா தவெக மாநாடு? இன்று முக்கிய அறிவிப்பு..!

விஜய்யின் தமிழக வெற்றிக்கழகம் நடத்தும் முதல் மாநாட்டிற்கு காவல்துறை அனுமதி இன்னும் கிடைக்கவில்லை என்பதால் புதிய தேதி இன்று அறிவிக்கப்படும் என செய்திகள் வெளியாகியுள்ளன.

கடந்த சில மாதங்களுக்கு முன்னர் நடிகர் விஜய் தமிழக வெற்றி கழகம் என்ற அரசியல் கட்சியை தொடங்கிய நிலையில் இந்த கட்சியின் மாநாடு விழுப்புரம் மாவட்டம் விக்கிரவாண்டி அருகே செப்டம்பர் 23ஆம் தேதி நடைபெறும் என்று அறிவிக்கப்பட்டிருந்தது.

இந்த மாநாட்டிற்காக காவல்துறையை அனுமதிக்கு விண்ணப்பம் செய்திருந்த நிலையில் காவல்துறையினர் மாநாடு நடக்கும் இடத்தை ஆய்வு செய்து சில கேள்விகளை கேட்டதாகவும் அதற்கு தமிழக வெற்றி கழகத்தின் பொதுச்செயலாளர் புஸ்ஸி ஆனந்த் பதில் அளித்ததாகவும் செய்திகள் வெளியானது.

இருப்பினும் மாநாட்டிற்கான அனுமதியை இன்னும் காவல்துறையை வழங்கவில்லை என்று கூறப்படும் நிலையில் மாநாடு தேதி நெருங்கி விட்டதால் இனி அனுமதி கொடுத்தாலும் மாநாட்டிற்கான ஏற்பாடு செய்வது கடினம் என்பதால் மாநாடு நடைபெறும் புதிய தேதி குறித்த அறிவிப்பு இன்று காலை 11 மணிக்கு வெளியாகிறது  என்றும், இந்த அறிவிப்பை தவெக தலைவர் விஜய் வெளியிடுவார் என்றும் கூறப்படுகிறது.

Edited by Siva