கடந்த 20ஆம் தேதி டிடிவி தினகரன் ஆதரவாளர் வெற்றிவேல், ஜெயலலிதா மருத்துவமனையில் சிகிச்சை பெறும் வீடியோவை வெளியிட்டார். ஆர்.கே.நகர் இடைத்தேர்தலுக்கு முந்தைய நாள் இந்த வீடியோ வெளியானது பெரும் பரபரப்பை ஏற்படுத்தியது.
இந்த வீடியோ வெளியிடப்பட்டது குறித்து டிடிவி தினகரன், வெற்றிவேல் தன்னிடம் வீடியோ வெளியிடுவது குறித்து எதுவும் கூறவில்லை என்று தெரிவித்தார். தன்னை அறியாமலேயே இந்த வீடியோ வெளியானது என்று தெரிவித்தார். இந்நிலையில் ஜெ. சிகிச்சை வீடியோ குறித்து இளவரசி மகள் கிருஷ்ணபிரியா கூறியதாவது:-
ஜெயலலிதாவும், சசிகலாவும் பேசிக்கொள்ளும் காட்சிகள் அதில் உள்ளது. அதை துண்டித்து சில வினாடி காட்சிகளை மட்டும் வெளியிட்டுள்ளனர். இந்த வீடியோ வெளியிடப்பட்டது சசிகலாவுக்கே தெரியாது. தன் மீது கொலைப்பழி வந்தபோது கூட வெளியிட விரும்பாத ஒரு வீடியோவை தினகரனுக்காக வெளியிட சசிகலா ஒப்புக்கொண்டிருக்க மாட்டார்.
