சமீபத்தில் நடந்து முடிந்த அதிமுக பொதுக்குழு கூட்டத்தில் எடப்பாடி பழனிசாமி பெரும்பான்மை பொதுக்குழு உறுப்பினர்களால் இடைக்கால பொதுசெயலாளராக தேர்ந்தெடுக்கப்பட்டார். ஆனால் இந்த பொதுக்குழுவே செல்லாது என ஓபிஎஸ் தரப்பில் கூறப்பட்டு வருகிறது. இதனால் ஏற்பட்ட மோதலில் அதிமுக தலைமை அலுவலகத்திற்கு சீல் வைக்கப்பட்டுள்ளது.
இந்நிலையில் கட்சி நிலவரம் குறித்து அதிமுக மூத்த தலைவர் பொன்னையன் ஓபிஎஸ் ஆதரவாளர் நாஞ்சில் கோலப்பனிடம் பேசியதாக வெளியான ஆடியோ அரசியல் வட்டாரத்தில் பரபரப்பை ஏற்படுத்தியுள்ளது.
இதுகுறித்து பேசிய எடப்பாடி பழனிசாமி அணியை சேர்ந்த சி.வி.சண்முகம் “இந்த ஆடியோ குறித்து பொன்னையனிடம் கேட்டபோது அது தனது குரல் இல்லை என கூறியுள்ளார். அது உண்மையாக இருக்கும்பட்சத்தில் அது குறித்து அவர் விளக்கம் அளிக்க வேண்டும் என்றாலும் வயது மூப்பின் காரணமாக அவர் பேச விரும்பவில்லை” என கூறியுள்ளார்.
