மகாராஷ்டிராவில் மும்பை – நவி மும்பையை இணைக்கும் இந்தியாவிலேயே மிக நீளமான பாலமான ”அடல்-சேது” பாலத்தை இன்று பிரதமர் மோடி திறந்து வைத்தார். மொத்தமாக 21.8 கி.மீ நீளம் கொண்ட இந்த பாலம் இந்தியாவின் மிக நீளமான பாலம் என்ற சாதனையை படைத்துள்ளது. இந்த பாலத்தில் 5.5 கி.மீ தொலைவு கடலுக்கு மேலே அமைந்துள்ளது. இந்த பாலம் இன்று திறக்கப்பட்ட நிலையில் நாளை முதல் இந்த பாலத்தில் பயணிக்க வாகனங்களின் தன்மைக்கேற்ப கட்டணங்கள் நிர்ணயிக்கப்பட்டுள்ளது.
அதன்படி ஒரு கார் ஒருவழியாக பயணிக்க ரூ.250 கட்டணமாகவும், சென்று திரும்பி வர ரூ.375 கட்டணமாகவும் நிர்ணயிக்கப்பட்டுள்ளது. அதுபோல ஒரு வழியாக மட்டும் பயணிக்க மினி பஸ்ஸிற்கு ரூ.400, பேருந்து, ட்ரக்குகளுக்கு ரூ.830, அதிக எடை கொண்ட கனரக வாகனங்களுக்கு ஒரு முறை செல்லவே ரூ.1580 என கட்டணம் நிர்ணயிக்கப்பட்டுள்ளது.
மாத பாஸ் எடுத்தால் கூட காருக்கு மட்டும் குறைந்த பட்சமாக ரூ12,500 வருகிறது. இந்த தகவல் பலகை புகைப்படம் சமூக வலைதளங்களில் வைரலாகி வரும் நிலையில் சிலர் “அரசு செலவில் கட்டிய பாலத்திற்கு இவ்வளவு கட்டணம் தேவையா? சற்று குறைத்து வசூலிக்கலாம்!” என்று கருத்து தெரிவித்து வருகின்றனர். அதேசமயம் மற்றும் சிலர் “இந்தியாவிலேயே 21 கி.மீ நீளம் கொண்ட மிக நீண்ட பாலம் இது. அதனால் இதை பராமரிப்பதற்கான செலவுகளை வாகன கட்டணங்களில்தான் ஈடு செய்ய வேண்டியிருக்கும் என்பதால் கட்டணம் விதிப்பது சரியே” என்றும் கருத்து தெரிவித்துள்ளனர்.
