கொல்கத்தாவை உலுக்கிய பெண் மருத்துவர் பாலியல் வன்கொடுமை மற்றும் கொலை சம்பவம் நாளுக்கு நாள் விஸ்வரூபம் எடுத்து வருகிறது. இதற்கு நீதி கேட்டும், மருத்துவர்களின் பாதுகாப்பை உறுதி செய்யக்கோரியும் கொல்கத்தாவில் மருத்துவர்கள் தொடர்ந்து போராட்டம் நடத்தி வருகின்றனர்.
பெண் மருத்துவர் பாலியல் பலாத்காரம் செய்யப்பட்டு கொலை செய்யப்பட்டதை கண்டித்து கடந்த 14ம் தேதி நடந்த ஆர்ப்பாட்டத்தில் நடிகையும், திரிணாமுல் காங்கிரஸ் கட்சியின் முன்னாள் எம்பியுமான மிமி சக்கரவர்த்தி மற்றும் நடிகர்கள் பலரும் கலந்துகொண்டனர்.
அது தொடர்பான புகைப்படங்களை மிமி சக்கரவர்த்தி தனது சமூக வலைத்தளங்களில் பதிவிட்டிருந்தார். இந்த நிலையில், சமூக வலைத்தளங்களில் சிலர் அவருக்கு பாலியல் வன்கொடுமை மிரட்டல் விடுத்து, ஆபாசமாக மெசேஜ்களை அனுப்புவதாகவும் எக்ஸ் வலைதளத்தில் பதிவிட்டு, சைபர் க்ரைமை டேக் செய்துள்ளார்.
கொலை செய்யப்பட்ட பெண் மருத்துருவருக்கு நீதி கேட்டு நாம் போராடி வருகிறோமா? விஷமுள்ள ஆண்களால், பாலியல் வன்கொடுமை அச்சுறுத்தல்கள்கூட இயல்பாக்கப்பட்டுள்ளன என்று குறிப்பிட்டுள்ளார். அவர்கள் கூட்டத்தோடு மறைந்திருந்து நீதிக்காக போராடுகிறார்கள் என நடிகை மிமி சக்கரவர்த்தி எக்ஸ் தளத்தில் பதிவிட்டுள்ளார்.
