மத்திய பிரதேச மாநிலம் இந்தூரை சேர்ந்த பியூஷ் மற்றும் வர்ஷா ஜெயின் தம்பதியின் ஒரே குழந்தையான வியானா, கடந்த ஆண்டு மூளை கட்டி காரணமாக உடல்நலக்குறைவால் பாதிக்கப்பட்டார். மருத்துவம் பலனளிக்காத நிலையில், அவர்கள் ஆன்மீக வழியில் தீர்வு தேடத் தொடங்கினர்.
மார்ச் 21 அன்று, ஆன்மீகத் தலைவர் ராஜேஷ் முனி மகாராஜை சந்தித்த குழந்தையின் பெற்றோர், அவரது பரிந்துரையின் பேரில் 'சாந்தாரா' எனும் மத சடங்கை ஏற்றனர். இதில், உயிரிழக்கும் வரை உண்ணாமல் இருப்பது வழக்கம். இது மரணத்திற்கே வழிவகுக்கும் துறவுச் செயலாகும்.
சீற்றமாக இருந்த உடல்நிலை காரணமாக வியானா விரைவில் உயிரிழந்தார். அவரது தாயார் “சாந்தாரா மூலம் வியானா இறந்துவிட்டாள்” என தெரிவித்தார். தந்தை பியூஷ் ஜெயின் கூறியதாவது, “மரணம் என்னும் நோக்கத்தில் அந்த சடங்கில் ஈடுபடவில்லை, ஆனால் குரு அவளது நிலைமை மோசமென கூறியதால், குடும்பம் ஒப்புக்கொண்டது” என்றார். இந்த சம்பவம் சமூகவலைதளங்களில் கடுமையாக விமர்சிக்கப்பட்டு வருகிறது.
2015ஆம் ஆண்டு, ராஜஸ்தான் உயர் நீதிமன்றம் சாந்தாராவை தற்கொலை என அறிவித்திருந்தாலும், உச்ச நீதிமன்றம் பின்னர் அதனை நிறுத்தி வைத்தது என்பது குறிப்பிடத்தக்கது.
