நில அபகரிப்பு தொடர்பாக தி.மு.க. முன்னாள் அமைச்சர் வீரபாண்டி ஆறுமுகம் மீது சேலம் மத்திய குற்றப்பிரிவு காவல்துறையினர் 2 வழக்குகள் பதிவு செய்ததைத் தொடர்ந்து சென்னை உயர் நீதிமன்றத்தில் முன்பிணை மனுக்கள் தாக்கல் செய்தார்.
இந்நிலையில் இன்று காலை சேலம் மத்திய குற்றப்பிரிவு காவல் நிலையத்திற்கு கையெழுத்து போட வந்தார். அப்போது நிலவாரப்பட்டி பாலமோகன் ராஜ் கொடுத்த நில அபகரிப்பு புகார் தொடர்பாக காவல்துறையினர் அவரை கைது செய்தனர்.
பின்னர் அவர் அய்யந்திருமாளிகையில் உள்ள 4வது ஜூடிசியல் மாஜிஸ்திரேட்டு ஸ்ரீவித்யா வீட்டில் ஆஜர் செய்யப்பட்டார். அவரை 15 நாள் காவலில் வைக்க மாஜிஸ்திரேட்டு உத்தரவிட்டார்.
இதைத் தொடர்ந்து அவரை கோவை மத்திய சிறையில் அடைக்க காவல்துறையினர் பலத்த பாதுகாப்புடன் கொண்டு சென்றனர்.
