ஈரோட்டில் போலியோ சொட்டு மருந்து கொடுத்த குழந்தை இறந்து விட்டதாக வதந்தியை பரப்பிய 2 பேரைக் காவல்துறையினர் நேற்று கைது செய்தனர்.
ஈரோட்டில் உள்ள ஒரு முகாமில் போலியோ சொட்டு மருந்து வழங்கிக் கொண்டிருந்த போது, சூளை பகுதியில் சொட்டுமருந்து கொடுத்த இரண்டு குழந்தைகள் இறந்து விட்டதாக 2 பேர் பொய்யான தகவலை தெரிவித்தனர்.
இதனால் அந்த முகாமில் பெரும் பதற்றம் ஏற்பட்டது. அங்கிருந்த காவல்துறை ஆய்வாளர் சண்முகம், பொய்யான தகவலைக் கூறிய 2 பேரையும் பிடித்து விசாரணை நடத்தினார்.
போலீசாரிடம் இருந்து தப்பியோட முயற்சித்த அவர்கள் இருவரும் கைது செய்யப்பட்டனர். விசாரணையில் அவர்களின் பெயர் உதயகுமார் (45), அவரின் நண்பர் லோகநாதன் (44) என்றும் தெரிய வந்தது. உதயகுமார் அஇஅதிமுக சுமை தூக்குவோர் சங்க தலைவராவார்.
அவர்கள் இருவரிடமும் காவல்துறையினர் தொடர்ந்து விசாரணை நடத்தி வருகிறார்கள்.
