மின்சார ரயில்களின் பயண நேரம் மாற்றி அமைக்கப்பட்டதை கண்டித்து ஏராளமான பயணிகள் அரக்கோணத்தில் இன்று ரயில் மறியல் போராட்டத்தில் ஈடுபட்டனர். இதனால் இரண்டு மணி நேரம் ரயில் போக்குவரத்து பாதிக்கப்பட்டது.
சென்னையில் இருந்து அரக்கோணத்திற்கு இயக்கப்படும் மின்சார ரயில்களின் நேரம் மாற்றப்பட்டதற்கு பயணிகள் எதிர்ப்பு தெரிவித்து வருகின்றனர். குறிப்பிட்ட நேரத்திற்குள் பணிக்கு செல்ல முடியவில்லை என அவர்கள் புகார் தெரிவித்து வந்தனர்.
இந்நிலையில் இன்று காலை 7 மணி அளவில் ஏராளமான பயணிகள் அரக்கோணம் ரயில் நிலையத்தில் தண்டவாளத்தில் அமர்ந்து மறியில் போராட்டம் நடத்தினர். காவல் துறை அதிகாரிகள் வந்து சமரசம் செய்து வைத்ததை அடுத்து அங்கிருந்து களைந்து சென்றனர்.
பயணிகளின் இந்த திடீர் மறியல் போராட்டத்தால் இரண்டு மணி நேரம் ரயில் போக்குவரத்து பாதிக்கப்பட்டது. ஹவுரா எக்ஸ்பிரஸ், ஏலகிரி எக்ஸ்பிரஸ் உள்ளிட்ட பல ரயில்கள் சென்னைக்கு தாமதமாக வந்து சேர்ந்தன. இதேபோல் சென்னையில் இருந்து புறப்பட்ட ரயில்களும் தாமதமாக புறப்பட்டு சென்றன.
