நடிகர் ஆர்யா நடிக்கவுள்ள 36-வது படத்தின் டைட்டில் இன்று வெளியாகியுள்ளது. இந்த அறிவிப்பு ரசிகர்களிடையே முன்னதாகவே எதிர்பார்ப்பை ஏற்படுத்தியிருந்த நிலையில், தற்போது வெளியான டைட்டில் டீசர் சமூக வலைதளங்களில் வேகமாக பரவி வருகிறது.
இந்த புதிய திரைப்படத்திற்கு "அனந்தன் காடு" எனப் பெயரிடப்பட்டுள்ளது. படத்தை ஜி. என். கிருஷ்ணகுமார் இயக்கி வருகிறார்; முரளி கோபி எழுதிய கதைக்கு, அஜனேஷ் லோக்நாத் இசையமைக்கிறார். ஒளிப்பதிவு யுவா, படத்தொகுப்பு வரியத் ஆகியோரின் பணியில் உருவாகிறது.
இந்த டீசரில் தீவிரமான மற்றும் அதிரடியான காட்சிகளுடன் வெளியாகியுள்ளது. டீசரில், வட்டமாக சூழ்ந்த வில்லன்கள் மத்தியிலே, கட்டப்பட்ட நிலையில் ஆர்யா காணப்படுகிறார். அவரை முற்றுகையிடும் இந்த காட்சிகள் படம் முழுவதும் ஆக்ஷன் நிறைந்ததென்பதை உணர்த்துகின்றன. மேலும், அதிகாரத்திற்கு எதிராக நின்று போராடும் வீரன் கதாபாத்திரமாக ஆர்யா இந்த படத்தில் நடித்து வருகிறார் என்பதும் டீசரில் வெளிப்படுகிறது.
இந்தப் படத்தில் நிகிலா விமல், இந்திரன்ஸ் உள்ளிட்ட பலர் முக்கிய கதாபாத்திரங்களில் நடித்துள்ளனர். தற்போது வெளியான டீசர் ரசிகர்களிடம் பெரும் வரவேற்பைப் பெற்று, இணையத்தில் பரபரப்பை ஏற்படுத்தி வருகிறது.
