கூடங்குளம் அணுமின் நிலையத்துக்கு எதிராக எங்கள் பகுதி பொதுமக்கள் நடத்திய அமைதியான அறவழிப் போராட்டங்களில் கலந்து கொண்டதற்காக என் மீது ஏராளமான பொய் வழக்குகள் போடப்பட்டன. கடந்த சட்டமன்றத் தேர்தல் பரப்புரையின்போது, வள்ளியூரில் நடந்த பொதுக்கூட்டத்தில் எங்கள் மீதான அனைத்து வழக்குகளையும் திரும்பப் பெறுவோம் என்று நீங்களே உறுதியளித்தீர்கள்.
இந்த அறிவிப்பாணையை நீக்குவதற்கு சென்னை உயர்நீதி மன்றத்தின் மதுரைக் கிளை நீதிமன்றம் இரண்டு முறை தீர்ப்பளித்த பிறகும், இரண்டாவது தீர்ப்பு என் மீது விதித்த நிபந்தனைகள் அனைத்தையும் முறைப்படி நிறைவேற்றி, இராதாபுரம் நீதிமன்றத்திடமிருந்து உரிய ஆமோதிப்பைப் பெற்ற பிறகும், தமிழ்நாடு காவல்துறையும், திருநெல்வேலி மாவட்ட காவல்துறை கண்காணிப்பாளரும் காலதாமதம் ஏற்படுத்தி வருகின்றனர். தில்லியிலுள்ள உள்துறை அமைச்சக துணை இயக்குனர் ஒருவருக்குப் பரிந்துரை செய்திருப்பதாகத் தெரிவித்துவிட்டு, பிரச்சினையை இழுத்தடிக்கின்றனர்.
