பருவமழை தொடங்கியுள்ள நிலையில் கடந்த சில நாட்களாக தமிழகத்தின் பல பகுதிகளில் கனமழை பெய்து வருகிறது. இன்றும் கனமழை காரணமாக சென்னை, திருவள்ளூரில் குறிப்பிட்ட தாலுக்காக்களில் பள்ளி விடுமுறை அறிவிக்கப்பட்டுள்ளது.
திருவள்ளூர் மாவட்டத்தில் பொன்னேரி, ஆவடி, பூவிருந்தவல்லி மற்றும் திருவள்ளூர் ஆகிய தாலுக்காக்களில் பள்ளிகளுக்கு விடுமுறை அளிப்பதாக அம்மாவட்ட ஆட்சியர் ஆல்பிஜான் வர்கீஸ் அறிவித்திருந்தார். திருவொற்றியூரிலும் மழை பெய்து வரும் நிலையில் விடுமுறை அளிக்காதது குறித்து ட்விட்டரில் ஒருவர் கேள்வி எழுப்பி இருந்தார்.
அதற்கு பதில் அளித்த திருவள்ளூர் ஆட்சியர் திருவொற்றியூர், மாதவரம், அம்பத்தூர் மற்றும் மதுரவாயல் தாலுக்காக்களுக்கான விடுமுறையை சென்னை ஆட்சியர் ஏற்கனவே அறிவித்துவிட்டதாக கூறியுள்ளார். மேற்கண்ட தாலுக்காக்கள் வருவாய் மாவட்டமாக சென்னையிலும், கல்வி மாவட்டமாக திருவள்ளூரிலும் இருப்பதால் இந்த விடுமுறை அறிவிப்பில் குழப்பம் எழுந்துள்ளது.
