கடந்த சில ஆண்டுகளாக, தமிழக மீனவர்கள் இலங்கை கடற்படையினரால் கைது செய்யப்படும் நிகழ்வு தொடர்கதை ஆகி வருகிறது. இதற்கு முற்றுப்புள்ளி வைக்கும் வகையில் நடவடிக்கை எடுக்க வேண்டும் என்று மத்திய மற்றும் மாநில அரசுகளை மீனவர் சங்கங்கள் தொடர்ந்து கேட்டுக்கொண்டு வருகின்றன.
நெடுந்தேவு அருகே எல்லை தாண்டி மீன்பிடித்ததாக ராமேஸ்வரத்தைச் சேர்ந்த எட்டு மீனவர்கள் இலங்கை கடற்படையினரால் கைது செய்யப்பட்டதாகவும், அவர்களுடைய இரண்டு விசைப்படகுகள் இலங்கை கடற்படையினரால் பறிமுதல் செய்யப்பட்டதாகவும் தகவல் வெளியாகியுள்ளது.
இந்த நிலையில், மீனவர்களை இலங்கை கடற்படை கைது செய்த சம்பவம் குறித்து தகவல் அறிந்த ராமேஸ்வரத்தை சேர்ந்த மீனவர்கள், கைதான மீனவர்களை மீட்க மத்திய மற்றும் மாநில அரசுகள் உடனடியாக நடவடிக்கை எடுக்க வேண்டும் என்று கோரிக்கை வைத்துள்ளனர்.
