மும்பையில், 12வது மாடியில் உள்ள அடுக்குமாடி குடியிருப்பின் சன்னல் வழியாக எதிர்பாராதவிதமாக தவறி விழுந்த நான்கு வயது சிறுமி உயிரிழந்த சம்பவம் பெரும் சோகத்தை ஏற்படுத்தியுள்ளது. அன்விகா பிரஜாபதி என்ற சிறுமி, செருப்பு வைக்கும் அலமாரியின் மீது அமர வைக்கப்பட்ட பின்னர், சன்னல் விளிம்பில் ஏறி அங்கிருந்து தவறி விழுந்ததாக தகவல்கள் தெரிவிக்கின்றன.
நேற்று இரவு சுமார் 8 மணியளவில் இந்த சம்பவம் நடந்துள்ளது. சிசிடிவி காட்சிகளின்படி, அன்விகாவும் அவரது தாயாரும் வெளியே செல்வதற்கு தயாராகி கொண்டிருந்தனர். முதலில் அன்விகா வீட்டை விட்டு வெளியே வர, அவரை தொடர்ந்து அவரது தாயார் வெளியே வந்து கதவை பூட்டுகிறார். அப்போது அன்விகா பெரியவர்களின் காலணிகளை அணிந்து கொள்வதை பார்க்க முடிகிறது.
சிறுமி நடமாடுவதை கண்ட தாய், அவளை தூக்கி செருப்பு வைக்கும் அலமாரியின் மேல் அமர வைக்கிறார். பின்னர், தாய் தனது செருப்புகளை அணிந்துகொண்டு, மகளின் காலணிகளை எடுக்கிறார். இதற்கிடையில், அன்விகா அந்த அலமாரியின் மீது நின்று, சன்னல் விளிம்பில் அமர முயற்சிக்கிறார். ஆனால், அவர் எதிர்பாராத வகையில் கீழே தவறி விழுந்துவிடுகிறார்.
இந்தக் காட்சியால் அதிர்ச்சியடைந்த அன்விகாவின் தாய் உதவி கேட்டு அழுகிறார். சத்தம் கேட்டு அக்கம் பக்கத்தினர் தங்கள் வீடுகளில் இருந்து வெளியே வந்து, சிறுமியை தூக்க அவசரமாக ஓடுகிறார்கள். உடனடியாக அன்விகா அருகில் உள்ள மருத்துவமனைக்கு கொண்டு செல்லப்பட்டார். அங்கு அவரை பரிசோதித்த மருத்துவர்கள், சிறுமி ஏற்கனவே உயிரிழந்துவிட்டதாக அறிவித்தனர்.
