இ-சிகரெட்டுகளை இதற்காகதான் தடை செய்தோம்! – மன் கீ பாத் நிகழ்ச்சியில் மோடி!

இன்று மன் கீ பாத் நிகழ்ச்சியில் பேசிய பிரதமர் நரேந்திர மோடி நாடு முழுவதும் இ-சிகரெட்டுகள் தடை செய்யப்பட்டதற்கான காரணங்களை விளக்கினார்.

புகையிலையில்லாமல் பேட்டரியில் செயல்படும் இ-சிகரெட்டுகள் நாடு முழுவதும் தடை செய்யப்பட்டது. இதுகுறித்து இன்று மன் கீ பாத் நிகழ்ச்சியில் பேசிய மோடி ”இ-சிகரெட்டுகள் நாட்டின் இளைஞர்களை கெடுக்கின்றன. எந்தவொரு குடும்பத்திலும் யாரும் புகைக்கக்கூடாது என்பதையே நான் விரும்புகிறேன். இந்தியா போன்ற வளர்ந்து வரும் ஜனநாயக நாட்டை இ-சிகரெட்டுகள் கெடுப்பதை அனுமதிக்கலாகாது.

சுவாச பிரச்சினை, இதய கோளாறு, நரம்பியல் கோளாறு போன்ற பல நோய்களை மக்களுக்கு தரும் இ-சிகரெட்டுகளை தடை செய்வதன் மூலம் மக்கள் தங்கள் வாழ்க்கையை நிம்மதியாக வாழ முடியும்” என்று கூறியுள்ளார்.

மேலும் தீபாவளி வாழ்த்துகளை மக்களுக்கு தெரிவித்த பிரதமர் மோடி பட்டாசுகளை வெடிக்கும் போது நமக்கும், மற்றவர்களுக்கும் தீங்கு ஏற்படாதபடி பார்த்து வெடிக்குமாறு அறிவுறுத்தினார்.