திருநெல்வேலி மாவட்டம் நாங்குநேரி அருகே, 7 கி.மீ. தொலைவில் அமைந்துள்ள கடம்போடுவாழ்வு திருக்கோவில், பண்டைய காலத்திலேயே கடம்ப மரங்களால் சூழப்பட்டிருந்ததாலும், அந்த மரங்கள் மக்களின் வாழ்வாதாரமாக இருந்ததாலும் இந்த பெயரால் அழைக்கப்படுகிறது.
இந்த ஆலயம் மன்னர் கால கட்டிடக் கலையை பிரதிபலிக்கிறது. ஈசான்ய மூலையில் கிழக்கு நோக்கி அமைந்துள்ள இந்த கோவில், பழமை வாய்ந்த திருக்குளத்துடன் வாசலிலேயே வரவேற்கிறது. உள்ளே நம்மை முதலில் சந்திப்பது நந்தி தேவர். மூலவர் கயிலாசநாதர் லிங்க ரூபத்தில் கிழக்கு நோக்கி அருள்பாலிக்கிறார். இடப்புறம் சக்திவாய்ந்த விநாயகர் எழுந்தருளியுள்ளார். தேவியின் சன்னிதியில் பொன்மலைவல்லி அம்மன் கருணைமிகு ரூபத்தில் காட்சி தருகிறார்.
முருகப்பெருமான் “தேசிக மெய்க்கண்ட ஆறுமுக நயினார்” என அழைக்கப்படுகிறார். சோழர் பாணியிலான சிற்பக் கலை, கருங்கல்லில் ஆன திருவாச்சி, மயில், நாகம், ஆகியவை அவருக்கு மேலும் அழகு சேர்க்கின்றன. பக்கத்தில் சண்டிகேஸ்வரர், பைரவர் சன்னிதிகள் உள்ளன.
கோவிலில் வில்வம், நாகலிங்கம், திருவோடு ஆகிய மரங்கள் தலவிருட்சமாக உள்ளன. திருக்குளம் இதற்கருகில் அமைந்துள்ளது.
இங்கு பிரதோஷம், சிவராத்திரி போன்ற விழாக்கள் சிறப்பாக நடைபெறுகின்றன. அருகிலுள்ள நாங்குநேரி வானமாமலை, திருக்குறுங்குடி, வள்ளியூர் முருகன் கோவில்கள் போன்று, இந்த ஆலயமும் பாரம்பரியம் மற்றும் ஆன்மிகம் நிறைந்த புனிதத் தலமாக விளங்குகிறது.
