பிரபல தமிழ் திரைப்பட நகைச்சுவை நடிகர் நாகேஷ் இன்று காலை சென்னையில் காலமானார். அவருக்கு வயது 76.
கடந்த சில நாட்களாகவே உடல்நலக்குறைவால் அவதிப்பட்டு வந்த அவரது உயிர் இன்று பிரிந்ததாக நாகேஷ் குடும்பத்தினர் தெரிவித்தனர்.
நாகேஷ் உடல் ஆழ்வார்பேட்டை சேமியர்ஸ் சாலையில் உள்ள அவரது வீட்டில் பொதுமக்கள் அஞ்சலிக்காக வைக்கப்பட்டுள்ளது. அவரது உடலுக்கு நடிகர்கள் ரஜினிகாந்த், கமலஹாசன், துக்ளக் சோ, மனோரமா, எஸ்.வி.சேகர், இயக்குனர்கள், தயாரிப்பாளர்கள் மலர் வளையம் வைத்து அஞ்சலி செலுத்தினர்.
மேலும் திரையுலகினரும் அவரது உடலுக்கு அஞ்சலி செலுத்தி வருகின்றனர். நாகேஷ் உடல் நாளை ஊர்வலமாக எடுத்து செல்லப்பட்டு பெசன்ட்நகர் மயானத்தில் தகனம் செய்யப்படுகிறது.
நாகேஷூக்கு ஆனந்த் பாபு உட்பட 3 மகன்கள் உள்ளனர். ஆனந்த் பாபுவும் சில படங்களில் கதாநாயகனாக நடித்துள்ளார்.
தமிழ்த் திரைப்படங்களில் நகைச்சுவை பாத்திரத்திற்கு வலு சேர்த்தவர் நாகேஷ். மறைந்த நடிகரும், முதலமைச்சருமான எம்.ஜி.ஆர். நடிகர் திலகம் சிவாஜி கணேசன், ஜெமினி கணேசன் உட்பட முன்னாள் முன்னணி நடிகர்கள் மட்டுமல்லாது, இளைய தலைமுறை நடிகர்களுடனும் நடித்துள்ளார்.
திருவிளையாடல் படத்தில் சிவாஜி கணேசனுடன் இவர் நடித்த தருமி பாத்திரம் மிகப்பெரிய வரவேற்பைப் பெற்றது. இன்றளவும் அந்த கேரக்டர் தமிழ் ரசிகர்கள் மத்தியில் பேசப்பட்டு வருகிறது.
காதலிக்க நேரமில்லை படத்தில் செல்லப்பா என்ற பெயரில் இயக்குனர் வேடத்தில் நாகேஷ் நடித்திருப்பார். படத்தில் அவரது தந்தை டி.எஸ். பாலையாவிற்கு கதை சொல்லும் விதமும் மிகச்சிறந்த நகைச்சுவை நடிகராக பிரபலப்படுத்தியது.
ஆரம்பத்தில் நகைச்சுவை பாத்திரத்தில் நடித்த போதிலும், பின்னாளில் குணச்சித்திர வேடங்களிலும் நடித்தார். சில படங்களில் வில்லன் பாத்திரங்களையும் ஏற்று நடித்துள்ளார்.
'நீர்க்குமிழி' என்ற படத்தில் நாகேஷை கதாநாயகனாக நடிக்க வைத்தார் இயக்குனர் கே. பாலச்சந்தர். அந்தப்படம் மிகப்பெரிய வெற்றியைப் பெற்றதுடன் சிறந்த நடிப்புத் திறமை கொண்டவர் நாகேஷ் என்பதை ரசிகர்களுக்கு உணர்த்தியது. எதிர்நீச்சல், சர்வர் சுந்தரம் போன்ற படங்களிலும் முக்கியப் பாத்திரமேற்று நாகேஷ் நடித்துள்ளார்.
நகைச்சுவை வேடம், வில்லன், குணச்சித்திர வேடம் என ஆயிரத்திற்கும் மேற்பட்ட படங்களில் நாகேஷ் நடித்துள்ளார்.
