முதலமைச்சர் கருணாநிதியை இன்று அவரது கோபாலபுரம் இல்லத்தில் நாடாளுமன்ற விவகாரம் மற்றும் அயல்நாடுவாழ் இந்தியர் நலத்துறை அமைச்சர் வயலார் ரவி சந்தித்து பேசினார்.
காலை 10.10 மணிக்கு முதலமைச்சர் கருணாநிதியின் இல்லத்திற்கு வந்த வயலார் ரவியுடன், தமிழக காங்கிரஸ் தலைவர் கே.வி.தங்கபாலு, டி.சுதர்சனம், பீட்டர் அல்போன்ஸ் ஆகியோர் வந்தனர்.
TN.Gov.
TNG
அவர்களை அமைச்சர்கள் ஆற்காடு வீராசாமி, துரைமுருகன், பொன்முடி, மாநிலங்களவை உறுப்பினர் கனிமொழி ஆகியோர் வரவேற்று அழைத்துச் சென்றனர். சுமார் அரை மணி நேரம் கருணாநிதியும், வயலார் ரவியும் தனியாக பேசினார்கள். அப்போது கனிமொழியும் உடனிருந்தார்.
இந்த சந்திப்பின் போது, வீரப்ப மொய்லி கூறியதாக வெளிவந்த செய்திக்கு வயலார் ரவி விளக்கமளித்ததாக கூறப்படுகிறது. மேலும் பல்வேறு விடயங்கள் குறித்து அவர்கள் பேசியதாகவும் தெரிகிறது.
பின்னர் வெளியே வந்த வயலார் ரவி செய்தியாளர்களிடம் பேசுகையில், ஆப்கானிஸ்தானில் பயங்கரவாதிகளால் கடத்திச் செல்லப்பட்டுள்ள சைமன் என்ற தமிழகத்தைச் சேர்ந்தவரை உடனடியாக மீட்க வேண்டும் என்றும், அதற்கு என்ன நடவடிக்கை எடுத்துள்ளீர்கள் என்றும் முதலமைச்சர் கருணாநிதி தம்மிடம் கவலையுடனும், அக்கறையோடும் விசாரித்தார் என்றார்.
மத்திய அரசு எடுத்து வரும் நடவடிக்கைகளை நான் விரிவாக முதல்வரிடம் எடுத்துக் கூறினேன் என்று தெரிவித்த வயலார் ரவி, நேற்று மத்திய அயலுறவு அமைச்சகத்தின் இணை செயலாளரிடம் நான் இது குறித்து பேசினேன் என்றும் அந்த அமைச்சகம்தான் இந்த பிரச்சனையை கையாண்டு வருகிறது என்றார்.
மேலும் ஆப்கானிஸ்தானில் உள்ள இந்திய தூதரகத்துடன் தொடர்ந்து பேசி வருகிறோம். சைமனை உயிருடன் மீட்க உரிய நடவடிக்கைகளை தொடர்ந்து எடுத்து வருகிறோம். இதுவரை இந்திய தூதரகம் மூலம் கிடைத்த தகவலின்படி அவரை உயிருடன் மீட்க சாத்தியக்கூறு உள்ளது என்று தெரிவிக்கப்பட்டுள்ளது. அவரை உயிருடன் மீட்பது ஒன்றுதான் முக்கியம். எனவே வேறு எதையும் பேச தேவையில்லை. நாங்கள் எடுத்து வரும் எல்லா நடவடிக்கைகள் பற்றிய தகவலையும் வெளிப்படையாக கூற முடியாது என்றார் வயலார் ரவி.
