நகைச்சுவை நடிகர் வடிவேலு அலுவலகம் தாக்கப்பட்ட வழக்கில் பிடியாணை பிறப்பிக்கப்பட்ட தே.மு.தி.க.வினர் 13 பேர் இன்று நீதிமன்றத்தில் சரண் அடைந்தனர். இதைத் தொடர்ந்து அவர்களது பிடியாணை உத்தரவை நீதிபதி ரத்து செய்தார்.
கடந்த ஆண்டு நடிகர் வடிவேலு அலுவலகம் தாக்கப்பட்டது தொடர்பாக தே.மு.தி.க.வை சேர்ந்த சதீஷ் குமார், ராதாகிருஷ்ணன், தயாளன், கண்ணன், கங்காதரன், வெங்கடேசன், அன்புராஜ், முருகன், மாரி, சரவணன், கிருஷ்ணன், சையது அலி, தட்சணாமூர்த்தி ஆகிய 13 பேர் மீது வழக்கு பதிவு செய்யப்பட்டது.
இந்த வழக்கு சைதாப்பேட்டை 9-வது குற்றவியல் நீதிமன்றத்தில் நடந்து வருகிறது.
கடந்த 22ஆம் தேதி இந்த வழக்கு விசாரணைக்கு வந்த போது நடிகர் வடிவேலு நீதிமன்றத்தில் ஆஜரானார். ஆனால் குற்றம்சாற்றப்பட்ட தே.மு.தி.க.வினர் 13 பேர் நீதிமன்றத்தில் ஆஜராகவில்லை. இதை தொடர்ந்து அவர்களுக்கு நீதிபதி பிடியாணை உத்தரவை பிறப்பித்தார்.
